Ministri i Mbrojtjes, Niko Peleshi në një konferencë të zhvilluar në Bazen Ajrore të Farkës, foli për situatën e zjarreve në vend.
Gjatë fjalës së tij, Peleshi shprehu vlerësimet për të gjithë që morën pjesë në operacionet e fikjes së zjarreve, ushtarët, zjarrfikësit dhe pilotët.
“Më luftën për të mbrojtur së pari jetën dhe pasurinë e qytetarëve dhe padyshim mjedisin. Dy qytetarë humbën jetën në Gjirokastër dhe katër të tjerë u lënduan. Dëmet do të kishin qenë të pallogaritshme nëse nuk do të ishte puna e përkushtuar e forcave tona. Të japim vlerësimet e merituara për ata që spikatën. Sa herë që ka operacione të mëdha vlerësimet nuk mund të jenë asnjëherë 100% objektive. Do t’ju lutesha që ato vlerësime që do të shpërndahen sot ti marrin sikur janë për gjithësecilin. Jam i prekur nga devocioni i ushtarakëve, zjarrfikëseve dhe pilotëve.” deklaroi ministri.
Më tej, Peleshi theksoi se kjo situatë që kaloi duhet të shërbejë edhe si një moment reflektimi. Ministri tha se janë mbajtur shënimet e nevojshme dhe vuri theksin te domosdoshmëria e modernizimit të Mbrojtjes Civile. Sipas tij, nga përballja me emergjencat civile duhet të mësojmë të gjithë.
“Sot është edhe ditë reflektimi. Kjo përballje na ka treguar sa i domosdoshëm është modernizimi i mbrojtjes Civile në Shqipëri. mbrojtja civile nuk është vetëm funksion i një strukture të vetme, ajo fillon nga komuniteti, tek bashkitë dhe ë pas te çdo institucion. Nga përballja me emergjencat duhet të mësojmë të gjithë. Ne kemi mbajtur shënimet tona, sa i përket gatishmërisë së mjeteve ajrore dhe të tjera. para pak ditësh kemi realizuar për herë të parë një kontratë model të mirëmbajtjes së helikopterëve. Do të ecim në këtë rrugë. Duke filluar nga ne dhe duke përfunduar te çdo kryeplak fshati është momenti të mbajmë shënime dhe të nxjerrim mësime tek përballja me emergjencat,” tha Peleshi./Opinion.al
