Zjarret e ditëve të fundit kanë djegur një sipërfaqe të konsiderueshme në Liqenin e Prespës së Vogël, pjesa më e madhe e të cilit është kënetëzuar dhe mbushur me kallamishte.
Sipërfaqja e djegur, që nis nga Shpella e Trenit dhe vazhdon deri në afërsi të kufirit grek, shkon në rreth 40 ha. Ekspertët e mjedisit ngrenë alarmin se zjarret e vazhdueshme në Liqenin e Prespës, kanë shkatërruar në mënyrë të pakthyeshme ekosistemin e liqenit, duke zhdukur habitatet e pelikanit kaçurrel, por edhe shpendëve dhe gjallesave të tjera që popullojnë liqenin e Prespës së Vogël.
Llazo Stojani, ekspert mjedisi: Pelikani kur vinin për herë të parë në shkurt bënin folenë në Prespë të Vogël dhe në Prespën shqiptare, tani pelikani ka ikur se i është djegur shtëpia, foleja. Shumë shpend, rosa, lejlek, zogj të ndryshëm me djegien e kësaj hapësire mendoj se do ta braktisin.
Banorët e fshatrave qē shtrihen përgjatë Liqenit të Prespës së Vogël, djegin në mënyrë të vazhdueshme kallamishtet, duke pasur si qëllim që edhe liqenin tashmë të kënetëzuar, ta shfrytëzojnë si tokë bujqësore.
Enver Llomi, kryetar i fshatit Zagradec: Prespa çdo vit në këtë kohë është djegur, çdo vit. Njerëz të papërgjegjshëm, kalojnë i vendosin shkrepësen dhe kaq, nuk ka ndonjë interes asnjë njeri që ta djegë, thjeshtë kot.
Rastet e zjarreve në liqenin e Prespës së Vogël janë të përvitshme, ndërsa ndërhyrja e Shërbimit Zjarrfikës në brendësi të liqenit është e kufizuar, çfarë bën që zjarri të vazhdojë për ditë të tëra.
Klan News
