Ambasadori gjerman, Peter Zingraf ka folur në lidhje me lirinë e medias në Shqipëri. Zingraf thekson se gazetaria ka nevojë për liri si dhe për siguri ligjore për të vijuar punën pa u censuruar.
Ambasadori thekson se një nga shtyllat mbajtëse për një shtet është dhe gazetaria e pavarur, për këtë arsye shprehet ai, gazetarët investigativë duhet të kenë liri duke u bazuar në ligjet ekzistuese.
Ndër të tjera, ambasadori gjerman ka folur dhe në lidhje për mediat online, duke thënë se; “Është thelbësore që rregullimi i mediave online të bëhet në përputhje me standartet evropiane dhe praktikat e mira. Gazetarët kanë nevojë për hapësirë lirie të mjaftueshme dhe njëkohësisht për siguri ligjore. Unë i inkurajoj institucionet shqiptare, të rishikojnë projektligjet në koordinim të ngushtë me gazetarët dhe përfaqësuesit e mediave.”
Postimi i plotë
Ambasadori Zingraf: „Gazetarët kanë nevojë për hapësirë lirie të mjaftueshme dhe njëkohësisht për siguri ligjore”
Ambasada Gjermane mban kontakte të ngushta me gazetarët dhe organizatat e mediave. Ambasadori Gjerman Peter Zingraf zhvilloi dje një bisedë rreth situatës së gazetarëve dhe sistemit të mediave në Shqipëri. Në përfundim të bisedës ai u shpreh:
“Një objektiv qendror i përafrimit në BE është pikërisht forcimi i strukturave demokratike. Një shtyllë mbajtëse për këtë është një gazetari e pavarur dhe kritike. Rreth kësaj diskutova sot me përfaqësues të OJQ-ve shqiptare që merren me fushën e mediave.
Në epokën e informacionit, gazetarëve dhe mediave të lira, si një “pushtet i katërt”, u duhet të luajnë një rol të rëndësishëm për t’u ofruar debateve sociale një platformë. Gazetarët investigativë kanë nevojë për liri dhe siguri, bazuar në ligjin ekzistues për punën e tyre. Së bashku ne duhet të kujdesemi për përmirësimin e kornizës ligjore për një gazetari të pavarur.
Në këtë kontekst, legjislacioni për mediat luan një rol të rëndësishëm. Unë po ndjek debatin aktual rreth projektligjeve për rregullimin e mediave online dhe kam marrë dijeni për rezervat e gazetarëve, shoqërisë civile por edhe të përfaqësuesve të organizatave ndërkombëtare si Përfaqësuesi i OSBE-së për Lirinë e Mediave dhe Ambasadori i BE-së.
Është thelbësore që rregullimi i mediave online të bëhet në përputhje me standartet evropiane dhe praktikat e mira. Gazetarët kanë nevojë për hapësirë lirie të mjaftueshme dhe njëkohësisht për siguri ligjore. Unë i inkurajoj institucionet shqiptare, të rishikojnë projektligjet në koordinim të ngushtë me gazetarët dhe përfaqësuesit e mediave./ Opinion.al E.Xh.
