Partia Demokratike ka ankimuar në KAS çertifikimin e rezultatit të zgjedhjeve të 11 majit nga KQZ për Qarkun Fier.
Ankimimi i PD për Qarkun Fier:
Zgjedhjet për Kuvend u caktuan në datën 11 maj 2025, me dekretin e Presidentit të Republikës.
Pas përfundimit të procesit të numërimit të votave në Qarkun Fier, KQZ-ja miratoi Tabelat Përmbledhëse të Rezultateve për subjektet zgjedhore dhe kandidatët e tyre për Zgjedhjet për Kuvend, sipas tabelave që janë bashkëlidhur vendimit, objekt ankimi [Bashkëlidhur Vendimi nr. 1317, datë 23.05.2025, i Komisionerit Shtetëror të Zgjedhjeve “Për miratimin e Tabelës Përmbledhëse të Rezultatit të votimit në zonën zgjedhore Qarku Fier, për subjektet zgjedhore dhe kandidatët për deputetë në zgjedhjet për Kuvendin e datës 11 maj 2025”].
Koalicioni PD-ASHM ka ardhur në dijeni të fakteve, indicieve dhe ka siguruar prova të mjaftueshme lidhur me problematika dhe parregullësi të rënda të procesit zgjedhor të ndodhura në të gjitha Qendrat e Votimit të Qarkut Fier.
Në Qarkun Fier, përdorimi i administratës publike dhe shtetërore si “makineri zgjedhore” ka qenë i përhapur dhe intensiv, duke krijuar një mjedis krejtësisht jo-transparent dhe të pabarabartë. Së pari, institucionet që duhet të jenë neutrale në procesin zgjedhor – nga administrata e bashkive deri te degët lokale të ministrive – janë mobilizuar në funksion të partisë në pushtet. Për shembull, funksionarë të ndryshëm jo vetëm që janë angazhuar në fushatë, por janë përfshirë në skema të mëdha të tjetërsimit të vullnetit të zgjedhësve, sikundër është blerja e votës.
Kjo gjendje, në thelb, e fshin ndarjen mes interesit publik dhe atij partiak, duke rrëzuar themelet e konkurrencës demokratike, sepse çdo forcë opozitare përballet me Shtetin Elektoral. Aty ku Partia-Shtet fillon së vepruari, zgjedhjet pushojnë së qeni të lira, të drejta dhe të barabarta.
Farsa elektorale që nevojitet të denoncohet është pikërisht kjo: opozita nuk hyn në garë me një fushatë të lirë dhe të ndershme, por përballet me një kundërshtar që gëzon të gjitha resurset shtetërore apo publike, si dhe mund të angazhojë edhe resurse private pa limit në dispozicion sa herë i nevojitet. Ndërkohë që partia në pushtet ka në dispozicion buxhetin e shtetit, rrjetin e administratës së fryrë artificialisht, dhe strukturat policore apo gjyqësore etj., si instrumente trysnie, subjektet opozitare operojnë me fondet e tyre të kufizuara dhe pa akses, duke u vendosur kështu në një disproporcion të skajshëm në kapacitet, dukshmëri dhe aftësi mobilizimi.
Po ashtu, përdorimi i bandave kriminale dhe i grupeve të dhunshme për të frikësuar votuesit është kulmi i këtij sistemi. PD-ASHM ka denoncuar raste ku këta individë kanë patrulluar zonat urbane dhe rurale, kanë bllokuar rrugë dhe kanë ushtruar presion të drejtpërdrejtë mbi individë apo familje, duke u imponuar veprime apo mosveprime të caktuara.
Në këtë kontekst, zgjedhjet në Shqipëri nuk janë më një mekanizëm përfaqësues i demokracisë, por një farsë elektorale ku rezultati parapërcaktohet nga instrumentet e Shtetit, i cili njësohet me Partinë, dhe sikur të mos mjaftonte, mbështetet në veprimtarinë e tij edhe nga grupet kriminale.
Edhe Raporti Paraprak i OSBE-ODIHR i datës 12 maj 2025, pra më pak se 24 orë pas mbylljes së procesit të votimit, sa i takon Qarkut Fier, ka evidentuar këto probleme serioze:
1/ Intimidimi dhe presioni mbi votuesit
Gjatë fushatës janë raportuar raste konkrete të përpjekjeve për të penguar pjesëmarrjen e opozitarëve në aktivitete politike në të gjithë Qarkun e Fierit. Vëzhguesit ndërkombëtarë kanë dokumentuar pretendime për mospjesëmarrje në tubime opozitare nga frika e hakmarrjes, si dhe presion mbi familje për të votuar për subjektin në pushtet. Këto forma presioni përfshijnë që nga kërcënime të heshtura deri te deklarata të hapura nga përfaqësues lokalë të pushtetit që ndikojnë në votën e lirë dhe të ndërgjegjshme të qytetarëve.
Të gjitha këto ngrejnë shqetësime serioze mbi standardet demokratike të procesit zgjedhor në këtë qark, si dhe mbi mundësinë reale të një gare të barabartë mes forcave politike.
2/ Përdorimi i burimeve shtetërore dhe klientelizmi
Edhe pse ky fenomen është gjerësisht i përhapur, në zona si Fieri shpërndarja e ndihmave sociale, emërimet e aprovuara nga pushteti lokal dhe investimet infrastrukturore janë perceptuar shpesh si “monedhë këmbimi” për vota. KQZ-ja ka trajtuar me ngurrim ankesat për keqpërdorim të burimeve administrative, duke lënë pa sanksione një pjesë të konsiderueshme të tyre.
Por, përtej problematikave mjaft shqetësuese që kanë ndodhur në Qarkun Fier, problem që ndikon në vlefshmërinë e zgjedhjeve kudo, ishte votimi nga jashtë.
Ndërkohë që votimi nga jashtë, pra vota e diasporës, si një e drejtë kushtetuese për çdo shtetas shqiptar mbi 18 vjeç që jeton jashtë territorit të Republikës së Shqipërisë, duhej të ishte një manifestim demokracie, ky proces u kthye në një manifestim të tjetërsimit të vullnetit të zgjedhësve, sikundër dëshmojnë të gjitha të dhënat publike dhe ato që do të parashtrojmë para Komisionit të Ankimimeve dhe Sanksioneve.
Është fakt i njohur botërisht se, megjithë kërkesat që PD-ASHM ka depozituar pranë KQZ-së, deri më sot nuk na është vënë në dispozicion asnjë provë e vetme nga ky organ që të provojë përmbushjen e kushtit ligjor, që zarfat janë marrë personalisht nga zgjedhësit në adresën e regjistruar në platformën elektronike.
