Australia do të ofrojë të paktën tre orë energji diellore falas çdo ditë për familjet, madje edhe ato pa panele diellore, sipas një programi për kursimin e energjisë që pritet të zbatohet në vitin 2026.
Nismën e njoftoi të martën ministri i Energjisë së vendit Chris Bowen, i cili shpjegoi se programi “Solar Sharer” do të fillojë në shtetet e Uellsit të Ri Jugor dhe Australisë Jugore, si dhe në juglindje të Queensland, përpara se të zgjerohet diku tjetër.
Përdoruesit do të marrin energji diellore falas në mesditë, kur prodhimi kulmon sipas shpjegimit të qeverisë.
“Ata që mund ta zhvendosin përdorimin e energjisë elektrike në periudhën e energjisë me kosto zero do të përfitojnë menjëherë, pavarësisht nëse kanë panele diellore apo jo dhe pavarësisht nëse zotërojnë apo marrin me qira, dhe sa më shumë njerëz që përfitojnë nga oferta dhe e zhvendosin përdorimin e tyre, aq më të mëdha do të jenë përfitimet e sistemit që ul kostot për të gjithë përdoruesit e energjisë elektrike”, tha Bowen.
Çmimet e aksioneve në dy nga ofruesit më të mëdhenj të energjisë elektrike në Australi, AGL dhe Origin Energy, ranë me 3% deri në fund të pasdites pas marrjes së këtij vendimi.
Rreth katër milionë familje në Australi kanë panele diellore në çatitë e tyre dhe gjatë orëve të pikut në ditët me diell ato furnizojnë aq shumë energji sa çmimet e energjisë elektrike bien, ndërsa kërkesa maksimale ndodh disa orë më vonë, duke ushtruar presion mbi rrjetin.
