Presidenti Ilir Meta ka reaguar lidhur me situatën e zgjedhjeve në institucionet e Arsimit të Lartë në Shqipëri.
Presidenti, thekson se ky është një proces tejet i rëndësishëm për të rinovuar autoritetet e reja dhe organet drejtuese të Institucioneve të Arsimit të Lartë në Shqipëri.
“Ky proces i ri zgjedhor duhet të mishërojë parimet kushtetuese, të zhvillohet në përputhje me ligjin dhe aktet e tjera nënligjore dhe të jetë transparent e gjithëpërfshirës.
Ndaj, në kushtet specifike në të cilat ndodhemi, është shumë i rëndësishëm angazhimi dhe bashkëpunimi i të gjithë aktorëve dhe institucioneve që kanë përgjegjësi në këtë proces. Është detyrë e tyre të harmonizojnë të gjitha veprimet dhe aktet rregullatorë, në mënyrë që ky proces i ri zgjedhor të garantojë pavarësinë, autonominë, konkurrencën e lirë, transparencën dhe integritetin për të arritur një rezultat të gjithëpranuar dhe për të përmbushur objektivat e Arsimit të Lartë në Shqipëri”, thuhet në deklaratën e Metës.
Zgjedhjet e rektorit dhe senatorëve të universiteteve publike kanë sjellë një konflikt në Univeristetin e Tiranës. Rektori Mynyr Koni ka kërkuar shtyrjen e zgjedhjeve dhe duke i kërkuar Ministrisë së Arsimit të nxjerrë një urdhër për këtë pasi sipas tij më shumë se 15 mijë studentë ngelin të përjashtuar nga ky proces si pasojë e situatës së koronavirusit.
Ditën e djeshme rektori firmosi shkarkimin e kryetares së Komisionit Institucional të Zgjedhjeve të Universitetit të Tiranës, Majlinda Keta me argumentimin se ajo kishte vepruar në kundërshtim me urdhrat e rektoratit. Nga ana e saj pedagogia deklaroi se vendimi i rektorit nuk ka fuqi juridike pasi ai nuk ka kompetencë ta shkarkojë atë. /Opinion.al
