Naftëtarët e Ballshit dolën sot në protestë pasi pretendonin se nuk i ka kaluar paga e premtuar nga ministrja Balluku.
Protestuesit u shprehen se dhe pse paga u premtua nga ministrja Balluku, asnjë nga mbi 850 naftëtarët nuk e ka marrë këtë pagë.
“Jemi mbledhur këtu jo për të thënë Rama ik, por Rama na jep lekët, lekët që na ka premtuar. Në rrugë ligjore na ka premtuar se do të na japë pagat e prapambetura të gjithë qytetarëve të Ballshit. I themi Ramës dhe qeverisë së tij se nuk jemi për lëmoshë, për 400 mijë lekë”, thanë ata.
Partia Demokratike doli më vonë në një deklaratë ku denoncoi këtë rast dhe tha se vendimi i qeverisë ka mbetur vetëm në letër.
Megjithatë kundër këtyre deklaratave është shprehur sot në studion e emisionit “Opinion”, ministri Arben Ahmetaj.
Sipas tij 720 punonjës të rafinerive të naftës në Ballsh kanë marrë pagën e luftës 40 mijë lekë të reja.
“Thanë sot nuk kanë marrë pagën punonjësit e rafinerisë, 720 punonjës kanë marrë paratë”, tha Ahmetaj.
Më herët edhe Ministrja e Infrastrukturës, Belinda Balluku ka publikuar vendimin e qeverisë të 23 prillit që i ka bërë naftëtarët e Ballshit pjesë të kategorisë përfituese të pagës prej 40 mijë lekë të reja dhe ajo është publikuar tashmë në Fletoren Zyrtare.
“Naftëtarët e Ballshit përfitojnë pagën e luftës prej 40 mijë lekësh. Vendimi i Qeverisë, i marrë në datë 23 prill 2020 dhe botuar tashmë në Fletoren Zyrtare, është më se i qartë dhe nuk ka asnjë vend për dyshime e as për abuzime politike”, shprehet Balluku.
Situata mbetet e paqartë pasi nga njëra anë qeveria deklaron se pagat kanë kaluar po nëse kjo do të ishte e vërtetë atëherë çfarë i ka shtyrë naftëtarët ta kishin atë si kërkesë në protestën e tyre. /Opinion.al
