Komisioni Qendror i Zgjedhjeve organizoi ditën e sotme testimin operacional për pajisjet e identifikimit elektronik të zgjedhësve.
Gjatë këtij procesi, kryekomisioneri i KQZ-së, Ilirjan Celibashi, së bashku me nënkryetaren e KQZ-së Lealba Pelinku kanë dhënë një deklaratë për mediat sa i takon procesit të votimit më 14 Maj.
Celibashi u shpreh se me pajijsjen e re teknologjike shmangia e identifikimit biometrik nga votues të caktuar do të jetë e pamundur.
“Kemi krijuar një sistem të tillë për këdo që në mënyrë manipulative kërkon të shmangë identifikimin elektronik, një votues nëse do të përdorë diçka për ta shmangur, kjo gjë do të jetë absolutisht e pamundur. Nëpërmjet një sistemi më të mirë të trajnimit të operatorëve procesi i identifikimit elektrik do të jetë më mirë i organizuar. Gjë e shtuar në këtë sistem është transmetimi në mënyrë periodike i të dhënave të pjesëmarrësve në ditën e zgjedhjeve. Do të kemi të dhëna reale të votuesve në ditën e zgjedhjeve. Nuk do ta bazojmë në sondazhe, por në fakte konkrete”, tha Celibashi.
Ndërkohë Pelinku theksoi se qëllimi është që në qendrat e votimit të ketë 5 mijë operatorë të cilët do të jenë të mirëtrajnuar në ditën e zgjedhjeve lokale.
“Tani që flasim kemi shtyrë afatin e aplikimeve për shkak të mos mbushjes së qendrave të votimit, shpresojmë të kemi 5 mijë operatorë, kemi shtyrë dhe afatin e trajnimit që në ditën e zgjedhjeve të kemi në nivelin më të lartë të votimit me operatorë”, tha nënkryetarja e KQZ-së./Opinion.al
