Ndërkohë që na ndajnë më pak se 24 orë nga hapja e qendrave të votimit, ku shqiptarët do të zgjedhin, anëtarët e rinj të parlamentit të ardhshëm, Komisioni Qendror i Zgjedhjeve ka njoftuar mbi numrin e zarfeve që votuesit nga jashtë kanë dërguar.
Konkretisht, deri në orën 12:00 kanë mbërritur 181,438 zarfe me fletë votimi të dërguara nga votuesit shqiptarë që jetojnë jashtë vendit.
Sipas të dhënave zyrtare, janë dërguar gjithsej 245 935 zarfe, nga të cilat janë marrë nga zgjedhësit 227 097, ndërsa 18 838 zarfe mbeten ende të pa tërhequra. Italia kryeson listën e vendeve me numrin më të madh të zarfeve të kthyera me 71.268, e ndjekur nga Greqia me 45 400. KQZ kujton se çdo zarf që mbërrin pas orës 19:00 të datës 11 maj do të shpallet i pavlefshëm. Pallati i Sportit “Feti Borova”, pranë Parkut Olimpik në Tiranë, është vendi i përcaktuar për administrimin dhe përpunimin e këtij procesi.
