Zgjedhjet e 14 majit, për Lulzim Bashën, janë tregues se ai mori vendimin e duhur për të përjashtuar nga Partia Demokratike Sali Berishën e shpallur “Non Grata” nga ana e aleatit kryesor të Shqipërisë, SHBA. Në takimin e tij në Durrës, Basha është shprehur se aso kohe i ka kërkuar Berishës që të largohet, por ai nuk ka pranuar, për pasojë vendosi që të merrte atë vendim, që e ka cilësuar si ndër më të vështirin.
Pyetur se si mund të bashkohet Partia Demokratike, Basha tha se “bashkimi duhet të ndodhë rreth vlerave”, thënë ndryshe pa Sali Berishën, pasi sipas ish kryedemorkatit, lideri historik nuk është më përfaqësues i vlerave mbi të cilat është ngritur kjo forcë politike.
“Që të shohim si të bashkohemi duhet të kuptohemi pse u ndamë, u ndamë për plaçkë, për interesa personale, aspak, ne u ndamë për bindje dhe vlera, bindja ime ka qenë që PD duhet t’i rrijë këtyre vlerave, aleanca me perëndimin është e rëndësishme, pjesë e saj është dhe lufta kundër korrupsionit dhe ne e kemi pranuar që kur SHBA-të mbajnë një qëndrim ndaj një individi në politik dhe ne e mbajmë këtë, ky ka qenë standardi me Tom Doshin dhe Vangjush Dakon, diçka na ndodhi edhe me liderin tonë historik, unë nuk u nguta, ndryshe nga sa do kishte bërë ai, i kërkova me respekt që të reflektonte, pata besim se do e bënte dhe kur kjo nuk u bë, mora një vendim, për interesin e atyre që më kishin besuar lidershipin. Ka qenë një vendim shumë i vështirë, por siç e provoi dhe 14 maji, vendim i drejtë, imagjinoni nëse ai do ishte tërhequr, sot do kishim një rezultat tjetër nga 14 maji, do kishim një shpresë të madhe, këtë nuk e kemi sepse dikush vendosi interesat e tij personale mbi PD, për problemin e tij personal, na ka çuar këtu ku jemi. Nuk ka ngjitje mekanike, demokratët duhen bashkuar rreth vlerave dhe kur bashkohemi rreth vlerave të jeni të sigurt se kushdo që e kupton PD si një instrument për të rregulluar vendin, do bashkohet”, tha Basha.
Ai zgjodhi që të mos kthente një përgjigje konkrete, nëse ka nisur fushatën për të rimarrë drejtimin e Partisë Demokratike.
“Nuk është fushatë, ju do e kuptoni se nuk besoj se ka prej jush si i bëj fushata. Kur të hapet gara për kryetar të PD, atëherë do ju kthej një përgjigje. Do i takojë anëtarësisë së PD të gjykojë, nëse investimi që jo kam bërë jo vetëm unë, me një lidership që s’ka lidhje me trekëndëshin e Bermudës, as në moshë, as në formim, as në moshë jo e jo”, u shpreh Basha.
Këto takime, sipas tij, janë për të treguar se ka një opozitë, e për rrjedhojë edhe shpresë për të ardhmen.
