Në një takim që zgjati rreth 40 minuta, presidenti ukrainas, Volodymyr Zelensky, vizitoi Papa Françeskun në Vatikan.
“Faleminderit për këtë vizitë”, tha Papa në prtijen e presidentit Zelensky. “Është një nder i madh”, u përgjigj presidenti. Zelensky e mbajti uniformën me pantallona ushtarake dhe xhup, edhe në takimin me Papën.
Papa Françesku i ka dhuruar presidentit ukrainas një skulpturë të vogël me një degë ulliri, simbol i paqes. Ndërkohë, presidenti ukrainas i dha Papës një ikonë të Shën Mërisë, pikturuar në mbetjet e një jeleku antiplumb.
Temat e bisedës mes Papës dhe Zelenskit “i referohen situatës humanitare dhe politike në Ukrainë të shkaktuar nga lufta. Papa – raporton zëdhënësi i Vatikanit Matteo Bruni – siguroi lutjet e tij të vazhdueshme, të dëshmuara nga thirrjet e tij të shumta publike që nga shkurti i vitit të kaluar. Të dy ranë dakord për nevojën e vazhdimit të përpjekjeve humanitare në mbështetje të popullatës. Papa theksoi veçanërisht nevojën urgjente për ‘gjeste njerëzore’ ndaj njerëzve më të brishtë, viktimave të pafajshme të konfliktit”.
Dhe, pas takimit me Papën, Zelensky shkroi në Telegram: “Jam mirënjohës për vëmendjen tuaj personale ndaj tragjedisë së miliona ukrainasve. Kam theksuar gjithashtu situatën e dhjetëra mijëra fëmijëve të dëbuar. Ne duhet të bëjmë çdo përpjekje për t’i sjellë ata në shtëpi. Gjithashtu, kërkova të dënohen krimet ruse në Ukrainë. Sepse nuk mund të ketë barazi mes viktimës dhe agresorit. Fola për formulën tonë të paqes si formulën e vetme efektive për arritjen e një paqeje të drejtë. Ai ofroi të bashkohej me zbatimin e saj”./Opinion.al
