Në fjalimin e tij të përnatshëm në rrjetin social “ Facebook” të dielën, presidenti i Ukrainës, Volodymyr Zelensky, ngriti akuza për torturë ndaj forcave pushtuese dhe u tha qytetarëve të tij që të përgatiteshin pasi Rusia do të kryente “operacione edhe më të mëdha në lindje të Ukrainës”.
“Ata mund të përdorin edhe më shumë raketa kundër nesh, edhe më shumë bomba ajrore”, tha ai. “Por ne po përgatitemi për veprimet e tyre. Ne do të përgjigjemi.”
Ai hodhi poshtë pretendimet ruse se vdekjet e civilëve në të gjithë Ukrainën ishin rezultat i sulmeve ushtarake të vetë Ukrainës, duke i quajtur ato një shenjë dobësie e Rusisë.
“Për vrasjet në Buçë thonë se nuk janë ata, por gjoja ne”, tha ai. “A e dini pse ndodh kështu? Sepse janë frikacakë.”
Ai shtoi: “Ata kanë frikë të pranojnë se e gjithë politika e Rusisë ndaj Ukrainës ka qenë e gabuar për dekada”.
Udhëheqësi ukrainas tha se për të mos pranuar gabimet, Rusia kishte bërë gabime të reja: “Ata e privuan veten nga çdo mjet politik dhe, duke mos dashur të hiqnin dorë nga ambiciet joreale, filluan këtë luftë”. “E gjitha erdhi nga frikacakët”, vazhdon ai.
“Kur frika rritet, ajo kthehet në një katastrofë. Kur njerëzve u mungon guximi për të pranuar gabimet e tyre, për të kërkuar falje, për t’u përshtatur me realitetin, për të mësuar, ata kthehen në përbindësha. Dhe kur bota e injoron atë, përbindëshat vendosin se është bota ajo që duhet të përshtatet me to”.
“Ukraina do të ndalojë të gjithë këtë”-përfundoi Zelensky./Opinion.al
