Seksioni për Hetimin e Narkotikëve në Policinë e Tiranës, në bashkëpunim me SHÇBA, kanë zbuluar se një efektiv i forcave të policisë dekonspironte operacionet anti-drogë që policia organizonte në Zall Bastar të Tiranës.
Emri Demalia, specialist i policisë së zonës, është arrestuar si i dyshuar për veprat penale “Shpërdorim i detyrës” dhe “Kultivim i bimëve narkotike”, kryer në bashkëpunim.
Ai ra në pranga pas finalizimit të operacionit “Zall Bastari” ku u arrestuan në total 6 persona, 3 u shpallën në kërkim dhe 1 tjetër është proceduar në gjendje të lirë.
Gjatë aksionit policia ka sekuestruar edhe dy çifte dhe sende të tjera të kundërligjshme.
Sipas informacionit zyrtar, grupi i akuzuar kultivonte kanabis në fshatin Mner i Sipërm, Njësia Administrative Zall Bastar, Tiranë.
Ata shfrytëzonin edhe ndihmën e policit Demalia për të garantuar se nuk do të kapeshin gjatë aksioneve anti-drogë.
Policia e Tiranës dhe SHÇBA po vijojnë punën për dokumentimin e plotë ligjor dhe kapjen e personave të tjerë të implikuar në këtë aktivitet kriminal. /Opinion.al
