Zbardhet vrasja e 26-vjeçarit Jurgen Kurti, e ndodhur në 18 mars 2019, në rrugën “Zef Jubani” në kryeqytet. Policia ka arrestuar tre persona të dyshuar si bashkëpunëtorë në këtë krim, ndërsa një i katërt është shpallur në kërkim.
Sipas informacioneve të para të bëra publike nga policia e kryeqytetit në pranga janë vënë: Elsi Levendi, 21 vjeç, Alesio Berberi, 33 vjeç, dhe Olsi Qalliaj, 22 vjeç. Këtyre tre personave iu janë sekuestruar një armë zjarri “Pistoletë TT”, fishekë luftarak, një automjet që u ka shërbyer autorëve për tu larguar pas kryerjes së krimit, një sasi e vogël lënde narkotike, 2470 Euro, lekë shqiptare, si dhe dy makina luksoze.
Zbardhja e krimit u bë nga Sektori i Hetimit të Krimeve ndaj Jetës dhe Pronës, në Drejtorinë e Policisë Tiranë dhe Prokuroria e kryeqytetit. Aktualisht ende nuk është i qartë motivi i ngjarjes, por njëri prej personave të arrestuar Elsi Levendi, rezulton i lindur në Athinë dhe banues në Tiranë, ndërsa Alesio Berberi dhe Olsi Qalliaj rezultojnë të jenë banues në Patos.
Policia sqaron se për arsye hetimore nuk bën dot me dije të dhëna të tjera pasi cënohet hetimi. Mbi tre te arrestuarit dhe personit te shpallur ne kerkim jane ngritur akuza per “Vrasje me paramendim e kryer në bashkëpunim”, “Prodhim dhe mbajtje pa leje të armëve luftarake”, “Prodhim dhe shitje të lëndëve narkotike”.
Më herët për këtë ngjarje ishte shpallur në kërkim dhe Dervis Arapi. 33-vjeçari është djali i Agim Arapit, i cili u vra dy vjet më parë në Durrës në ambientet e dyqanit te tij. Për atë krim u përfol si i përfshirë edhe Jurgen Kurti, por pas disa orësh në polici, ai u la i lirë. Arapi, i cili jeton jashtë Shqipërisë, ka përjashtuar veten plotësisht nga kjo ngjarje dhe është shprehur i gatshëm për t’u marrë në pyetje
Njoftimi i plotë i policisë:
Zbardhet ngjarja e ndodhur më datë 18 mars 2019, në rrugën “Zef Jubani”, ku u vra me armë zjarri 26 vjetari J. K. Arrestohen tre shtetas si bashkëpunëtorë në vrasje, si dhe u shpall në kërkim një tjetër. Sekuestrohen një armë zjarri “Pistoletë TT”, fishekë luftarak, një automjet që u ka shërbyer autorëve për tu larguar pas kryerjes së ngjarjes, një sasi e vogël lënde narkotike, 2470 Euro e lekë shqiptare, si dhe dy makina luksoze.
Pas një pune të mirë organizuar nga Sektori i Hetimit të Krimeve Ndaj Jetës dhe Pronës, në D.V.P.Tiranë, në bashkëpunim me Prokurorinë e Rrethit Gjyqësor Tiranë, në lidhje me ngjarjen e ndodhur në datë 18 mars 2019, rreth orës 22:30, në rrugën “Zef Jubani”, ku u vra me armë zjarri shtetasi, J.K., 26 vjeç, është arritur të bëhet dokumentimi ligjor i kësaj ngjarje ku janë ndaluar/arrestuar shtetasit:
– E. L., 21 vjeç, lindur në Athinë/Greqi dhe banues në Tiranë;
– A. B., 33 vjeç, lindur në Patos dhe banues në Patos, Fier;
-O. Q., 22 vjeç, lindur në Fier dhe banues në Patos.
Si dhe u bë shpallja në kërkim e një shtetasi tjetër.
Nga informacionet e grumbulluara, provat e administruara dhe të sekuestruara, si dhe tërësia e veprimeve hetimore të kryera, dyshohet se autorët e kësaj ngjarje janë shtetasit e mësipërm së bashkë me një shtetas tjetër të shpallur në kërkim.
Policia gjatë kontrollit fizik dhe në banesat e këtyre shtetasve gjeti dhe sekuestroi një automjet që u ka shërbyer autorëve për tu larguar nga vendi i ngjarjes, si dhe dy makina të tjera luksoze.
Gjithashtu u gjet dhe një armë zjarri “Pistoletë TT”, fishekë luftarak, një sasi prej 2470 Euro e lekë shqiptare, 13 aparate celular, si dhe një sasi e vogël lënde narkotike.
Veprimet hetimore janë në vazhdim e sipër për të bërë të mundur dokumentimin e plotë me prova ligjore të personave të tjerë të përfshirë në këtë ngjarje, si dhe për dokumentimin e motiveve të kësaj ngjarje.
Për arsye hetimore nuk bëjmë me dije të dhëna të tjera pasi cenojnë hetimin. Materialet ju dërguan Prokurorisë Rrethit Gjyqësor Tiranë, për veprat penale penale “Vrasje me paramendim e kryer në bashkëpunim”, “Prodhim dhe mbajtje pa leje të armëve luftarake”, “Prodhim dhe shitje të lëndëve narkotike”./Opinion.al
