Ish-Kryeministri Sali Berisha priti në një takim Thomas O’ Melia, ndihmës administrator i USAID për Europën dhe Euroazinë, i cili shoqërohej në këtë takim nga ambasadori amerikan, Donald Lu.
Në këtë takim u diskutua për reformën në drejtësi, për të cilën Berisha shprehu falënderimet për mbështetjen e ambasadorit Lu dhe të qeverisë amerikane, e cila, theksoi ai, është jetike për vendin dhe progresin e tij drejt BE.
Berisha u shpreh se reforma u shty dhe u ngadalësua shumë pasi Edi Rama, duke i bërë vendit një dëm shumë të madh, refuzoi konsensusin dhe doli me tezën se në Shqipëri nuk është punuar ndonjëherë me konsensus, në një kohë që çdo reformë e madhe në këtë vend, në këto 25 vite, është bërë vetëm me konsensus.
Nga ana tjetër, Berisha tha se problemi më kardinal me të cilin sot përballet vendi është krimi, krimi i lidhur me nivelet më të larta të qeverisë, i cili po rrënon çdo ditë reputacionin e Shqipërisë dhe që kërcënon si stabilitetin e vendit ashtu dhe progresin drejt BE-së.
Ndihmës Administratori i USAID-it Melia i bëri thirrje liderëve shqiptar të bëjnë hapa para me miratimin e reformës në drejtësi, duke i quajtur ndryshimet kushtetuese dhe ligjore të propozuara si “jetike jo vetëm për një sistem të drejtë gjyqësor, por dhe për një demokraci funksionale. Tani është momenti i duhur. Vonesat dëmtojnë integrimin e Shqipërisë në BE dhe zhvillimin e vendit.”
Ai e quajti shumë të rëndësishme shoqërinë civile dhe median që çdo proces reformash të fitojë legjitimitet para publikut dhe qëndrueshmëri.
