Kryeprokurorja e përkohshme Arta Marku nuk doli sot përpara komisionit të vettingut, por në mungesë të saj, por u përfaqësua nga avokatja Lirime Çukaj. E pavarësisht se vet nuk ka qenë e pranishme, ajo ka dërguar njerëzit e saj besnikë të monitorojnë procesin. Në sallë ishin sektretarja e pergjithshme Alketa Zifla, Besnik Cami dhe këshilltari Denion Ndrenika.
Komisioni i Pavarur Kualifikues, me trupë gjykuese të përbërë nga Genta Tafa, Pamela Qirko dhe Suela Zhegu, pritet të vlerësojë aftësitë profesionale dhe të figurës, si dhe pasurinë e kreut të organit të akuzës. Sot ishte seanca degjimore, ndersa neser shpallet vendimi per te.
Kryesuesja e trupës së KPK-së, Suela Zhegu është shprehur gjatë seancës se Arta Marku i është nënshtruar procesit të vettingut me përparësi, sepse kandidon për në Këshillin e Lartë të Prokurorisë. Më 9 janar, ajo ka depozituar dorëheqjen si kandidate anëtare për në KLP-në.
Sa i përket vlerësimit të pasurisë, ILDKPKI-ja ka dorëzuar raportin me konstatimin se deklarimi i Arta Markut është i saktë, duke mos kryer fshehje pasurie. Edhe hetimi i thelluar, sipas Zhegut konstatoi vërtetësinë e këtyre gjetjeve.
Kryeprokurorja e përkohshme Marku zotëron dy apartamente banimi në Shkodër, një prej 103 metrash katrorë me vlerë 5 mln lekë dhe një tjetër prej 66 metrash katrorë, ndërsa ka në proces legalizimi një shtesë prej 9 metrash katrorë.
Në lidhje me aftësitë profesionale, shtetasi A.P. është ankuar sepse Arta Marku ka kërkuar arrest me burg për të, për akuzën e drejtimit të parregullt të mjetit. KPK-ja, referuar edhe vendimeve të Gjykatës Europiane, duhej të arsyetonte se përse kërkoi këtë masë ekstreme si arresti me burg.
Pasi mori detyrën e Prokurores së Përgjithshme, Arta Marku ndërmori masa për disa komandime, duke pezulluar disa të tjera. Asaj iu bënë pyetje specifike për këtë mënyrë riorganizimi. Marku ka shpjeguar se nuk ka procedurë për personat që komandohen përkohësisht, e pavarësisht se i janë kërkuar shpjegime, ajo nuk ka paraqitur dokumente, por ka informuar se urdhri për komandimet është i bazuar në ligj.
Ndaj Arta Markut pati dy denoncime në KPK, por pas shpjegimeve dhe verifikimeve është konstatuar se hetimet e kryeprokurores ndaj dy shtetasve denoncues ishin të drejta.
E pyetur nga Genta Tafa nëse kishte një arsye të qenësishme për mungesën e Arta Markut, pasi e konsideronte si prestigj praninë e saj, avokatja i është përgjigjur se nuk ka asnjë arsye.
Ndërkohë, Theo Jacobs, vezhgues nderkombetar ne salle ka shprehur zhgënjimin e tij për mungesën e saj:
“E shoh si një shenjë jo të mirë mungesën e saj. Arta Marku duhej të ishte këtu. Në lidhje me rastin e shtetasit që është arrestuar për shkelje të rregullave të qarkullimit rrugor, sepse kishte pire pak më shumë raki, Arta Marku kërkoi dy herë arrest me burg për të. Nuk e mbështes idenë që duhet të drejtosh nën efektin e alkoolit, por dua të përqëndrohem te kërkesa ekstreme për arrest me burg. Së pari, subjekti ka një përvojë të lartë si prokurore, nuk është fillestare. Ajo e di dallimin mes një çështjeje të vështirë dhe të thjeshtë”, tha Jacobs.
Mesazhi që Jacobs dëshironte t’i çonte Arta Markut është se ajo duhet të bëjë diçka për dhënien e masave të sigurisë.
“Shoh jurisprudencën e Gjykatës së Lartë në Shqipëri. Në 2011, Kolegjet e Bashkuara kanë thënë se kërkesa e paraqitur nga prokurori për caktim masash sigurie duhet të jetë e argumentuar në lidhje me rrezikshmërinë e veprës”, tha ai, duke shtuar shifrat e paraburgimit në Shqipëri janë të larta.
“Duke mare parasysh se Arta Marku i dha këtij personi 2 muaj burg dhe e mban atë dy javë në paraburgim, shoh se nuk ka balancë. Këndvështrimi është që duhet ta mbajë parasysh dhe jo të japë urdhra, por të fillojë të ndryshojë mentalitetin e Prokurorisë. Të mendohen dy herë kur kërkohet arrest me burg”, vijoi përfaqësuesi i ONM-së.
Avokatja tha se prokuroria kërkon arrest me burg, por është gjykata që vendos, por Jacobs kundërshtoi duke thënë se prokuroria duhet të argumentojë kërkesën e saj dhe çështja duhet t’i përshtatet rrethanave.
Edhe sipas Drejtorisë së Sigurimit të Informacionit të Klasifikuar, Marku rezulton e përshtatshme për detyrën e saj. Ish-prokurorja e Shkodrës u zgjodh Kryeprokurore e përkohshme në Kuvend, në një seancë të pazakontë më 18 dhjetor të vitit të shkuar, pas 17 vitesh punë në sistemin e drejtësisë.
