Xhihadistët kanë sulmuar një bazë ushtarake në Somali, në të cilën trupat amerikane stërvisnin forcat speciale lokale. Baza, e cila ndodhet rreth 100 km në perëndim të kryeqytetit Mogadishu, strehon forca speciale amerikane, forca speciale somaleze dhe paqeruajtës të Ugandës.
Sulmi ndodhi në bazën Baledogle, në rajonin Shabelle e Poshtme, dhe deri më tani nuk është raportuar për viktima. Përgjegjësinë për të e mori grupi militant Al-Shabab, duke thënë se ka përdorur një makinë bombë për të hyrë në bazë.
Shtetet e Bashkuara i kanë shtuar ndjeshëm sulmet ajrore kundër grupit Al-Shabab, i cili është i lidhur me Al-Kaidën, prej janarit të vitit 2017 kur presidenti Donald Trump ka marrë detyrën.
Departamenti amerikan i Shtetit thotë se Al-Shababi ka kontroll mbi pjesë të mëdha të Somalisë dhe ka aftësi të kryejë sulme me bombardues vetëvrasës, pajisje eksplozive, dhe armë të vogla./Opinion.al
