Presidenti amerikan, Donald Trump, ka njoftuar se do të urdhërojë një hetim mbi lidhjet e dyshuara të financuesit pedofil Jeffrey Epstein me banka të mëdha dhe disa demokratë të shquar, përfshirë ish-presidentin Bill Clinton.
Në një njoftim në mediat sociale, kreu i Shtëpisë së Bardhë tha se do t’i kërkonte Prokurores së Përgjithshme Pam Bondi dhe FBI-së të hetonin “përfshirjen dhe marrëdhënien” e Epstein me Clinton dhe të tjerët “për të përcaktuar se çfarë po ndodhte me ta dhe me të”.
Interesi për marrëdhëniet e Epstein u rigjallërua këtë javë pasi ligjvënësit amerikanë publikuan më shumë se 20,000 faqe dokumentesh nga pasuria e tij, duke përfshirë disa që përmendin Trumpin.
Klinton ka mohuar fuqimisht se kishte ndonjë dijeni për krimet e Epstein.
Përveç Clinton, Trump tha se i kërkoi Departamentit të Drejtësisë (DoJ) të hetojë bankat JP Morgan dhe Chase, ish-Sekretarin e Thesarit Larry Summers dhe themeluesin e LinkedIn Reid Hoffman, i cili është gjithashtu një donator i shquar demokrat.
“Epstein ishte demokrat dhe ai është problemi i demokratit, jo problemi i republikanit. Të gjithë e dinë për të, mos e humbni kohën me Trumpin. Kam një vend për të drejtuar!” shkroi ai në rrjetet sociale.
Një zëdhënës i JPMorgan Chase tha se firma shpreh keqardhje për “çdo lidhje” që kishin me Epsteinin dhe shtoi se kompania “nuk e ndihmoi atë të kryente aktet e tij të tmerrshme”.
Kërkesa e Trump vjen përpara votimit të Dhomës së Përfaqësuesve javën e ardhshme nëse departamenti i drejtësisë duhet të publikojë të gjitha dosjet e tij që lidhen me hetimin ndaj Epstein, i cili vdiq në burg në vitin 2019.
