Deputeti i CDU-së, Johann Wadephul, në një interviste për Deutsche Welle nuk ka ndryshuar qëndrim për vendosjen në qendër të kritikave të ministrit të Brendshëm, Fatmir Xhafaj pas publikimit të skandalit për përfishrjen e të vëllait në trafikun e drogës.
Wadephul ka kërkuar edhe më parë në disa intervista që ministri Xhafaj duhet të përballet me akuzat, deri dhe dorëheqjen e tij.
Por, i pyetur nga DW pikërisht për këto deklarata, deputeti i CDU-së u shpreh se ministri i Brendshëm i Shqipërisë duhet të pyesë vetën, nëse mund t’a përmbushë detyrën plotësisht i pavarur. Duke risjellë edhe një herë tjetër në kujtesë se i vëllai i tij është ekspozuar ndaj akuzave.
“Unë mendoj, se një person me një përgjegjësi të tillë duhet vetë të verifikojë, nëse mund t’a kryejë detyrën i pavarur, nëse mund të drejtojë me përgjegjësi një proces në shtetin e së drejtës, kur ka akuza të forta, dhe kur vëllai i tij është përballur me procese në Itali”,- tha Wadephul.
Sipas tij, qeveria duhet të vendosë vetë nëse ai është personi i duhur që e vazhdon këtë detyrë.
Ndërsa, thekson se edhe ambasadori amerikan që ka qenë mjaft miqësor ndaj qeverisë, në këtë rast ka ushtruar kritikë të fortë.
Pjesa e shkëputur nga intervista e dhënë për Deutsche Welle
Pyetja e DW: Një person që u vendos në qendër të kritikave është ministri i Brendshëm i Shqipërisë, zoti Fatmir Xhafaj. Ju keni kërkuar në disa intervista shumë konkretisht, që ai duhet të përballet me akuzat, deri edhe dorëheqjen e tij. Të enjten zoti Xhafaj u takua me ministrin e Brendshëm gjerman, zotin Horst Seehofer. Më pas ai shkroi se gjithçka u zhvillua në konsesus të plotë. U vendos paqja?
Wadephul: Unë besoj se ministri i Brendshëm i Shqipërisë duhet të pyesë veten, nëse mund ta përmbushë detyrën plotësisht i pavarur. Vëllai i tij është ekspozuar ndaj akuzave. Dhe unë mendoj, se një person me një përgjegjësi të tillë duhet vetë të verifikojë, nëse mund ta kryejë detyrën i pavarur, nëse mund të drejtojë me përgjegjësi një proces në shtetin e së drejtës, kur ka akuza të forta, dhe kur vëllai i tij është përballur me procese në Itali. Qeveria duhet të vendosë vetë, nëse ai është personi i duhur që e vazhdon këtë detyrë. Unë kujtoj, se edhe ambasadori amerikan,që ka qenë mjaft miqësor ndaj qeverisë, në këtë rast ka ushtruar kritikë të fortë.
