Futbollisti Mario Pineida (33 vjeç) u qëllua për vdekje në qytetin port të Guayaquil të mërkurën, tha ekipi i tij. Guayaquil është bërë një vatër e dhunës nga bandat e lidhura me trafikun e drogës dhe disa lojtarë futbolli në Ekuador janë shënjestruar muajt e fundit.
Pineida ishte pjesë e ekipit kombëtar të Ekuadorit gjatë ndeshjeve kualifikuese të Kupës së Botës 2018 dhe 2022. Ai luajti gjithashtu për Fluminense në vitin 2022.
Në një postim në ‘X’, klubi i tij, Barcelona SC, tha se “njofton me hidhërim të thellë, se është njoftuar zyrtarisht për vdekjen e lojtarit Mario Pineida, një ngjarje që ndodhi pas një sulmi kundër tij” në Guayaquil.
Vdekja e Pineidës u konfirmua nga Ministria e Brendshme, e cila tha se ka caktuar një njësi speciale hetimore për rastin.
Portali ‘Primicias’ raportoi se Pineida u sulmua nga dy persona që udhëtonin me motoçikleta, të cilët hapën zjarr ndaj tij, nënës së tij dhe një gruaje tjetër.
Në shtator, tre lojtarë nga divizioni i dytë i Ekuadorit u vranë, njëri prej të cilëve dyshohet se ishte i lidhur me bastet sportive. Një muaj më vonë, futbollisti vendas Bryan Angula u plagos nga një e shtënë me armë zjarri.
Ekuadori, dikur një nga vendet më të sigurta të Amerikës Latine, është bërë një qendër kryesore tranziti e kokainës midis prodhuesve kryesorë të Kolumbisë dhe Perusë dhe konsumatorëve në të gjithë botën.
Sulmet me bombë në makina, të shtënat me armë dhe zhvatja kanë qenë në rritje në Guayaquil, i cili regjistroi 1,900 vrasje midis janarit dhe shtatorit të këtij viti, numri më i lartë në Ekuador.
