Një debat po zhvillohet përmes rrjeteve sociale mes Majlinda Bregut, Saimir Tahirit dhe Ylli Manjanit. Shkak është bërë vrasja monstruoze në Fier, ku Ferdinand Ruko vrau në mënyrë barbare gruan e tij, duke e hedhur të zhveshur nga kati i 4-t i banesës.
Institucionet nuk mbajnë përgjegjësi për faktin se viktima nuk ishte mbrojtur edhe pse kishte denoncuar dhunën në polici.
Pak ditë para vrasjes ajo kishte kërkuar urdhër-mbrojtje, por asnjë masë nuk ishte marrë për të dëbuar dhunuesin nga familja. Ka qenë Majlinda Bregu ajo që ka reaguar ashpër në fillim ndaj Manjanit të cilit i kërkonte të merrte masa ndaj gjyqtarit që nuk dha urdhër-mbrojtje për Liljana Rukon.
Sot Bregu publikon për herë të parë urdhërin e mbrotjes së Liljana Rukos, lëshuar më 9 Nëntor të këtij viti. Bregu thotë se ky dokument i është vënë në dispozicion nga Ministria e Drejtësisë. Në përgjigje të saj ka reaguar Ministri i Brendshëm Saimir Tahiri i cili thotë se urdhëri i mbrojtjes në fjalë nuk ka mbërritur kurrë në polici, ai aludon se ka mbetur sekretarive të gjykatave.
Statusi i Bregut
Ministria e Drejtesisë më ka përcjellë sot, kopjen e Urdhrit të Mbrojtjes së te ndjerës Liljana Rukaj. Në urdhër thuhet se burri dhunues nuk duhet t’ i afrohet sikur edhe në dy metra distancë viktimës. Sipas ligjit për Masat Parandaluese të Dhunës në Familje, urdhri hyn në fuqi menjëherë dhe zbatimi i tij fillon pavarësisht nëse i padituri është njoftuar ose jo.
Brenda 24 orëve, gjykata u dërgon kopje të urdhrit të mbrojtjes: viktimës dhe personave të tjerë të përmendur në urdhrin e mbrojtjes; prokurorit, kur ky ka paraqitur kërkesën; zyrës së shërbimeve sociale pranë bashkisë ose komunës ku viktima, ose personat e tjerë të përmendur në urdhrin e mbrojtjes, që kanë banim të përkohshëm ose të përhershëm; komisariatit të policisë së vendndodhjes ku viktima ose personat e tjerë të përmendur në urdhrin e mbrojtjes që kanë banim të përkohshëm ose të përhershëm. Nese e ndjera Liljana Rukaj ka patur nje urdher mbrojtje nga Gjykata pse nuk u mbrojt dot?
Tani i takon Ministrisë së Brendshme për të sqaruar: -Cfarë masash ka marrë policia pas vendimit të Urdhrit të Mbrojtjes për Liljana Rukaj?
-Nëse Viktima ka kërkuar ndihmë nga Komisariati i Zonës së banimit për shkelje të Urdhrit të Mbrojtes?
-Nëse burri shtazë ka thyer detyrimin për të mos iu afruar viktimës sic e cakton Urdhri Mbrojtes, a ka një ankim dhe me pas regjistrim për këtë veper penale nga Komisariati i Fierit? Kush nuk e mbrojti Liljana Rukaj?!
Përgjigja e Tahirit
Deputetja Majlinda Bregu ka publikuar sot nje urdher mbrojtje per Liljana Rukaj, viktimen e dhunes se bashkeshortit ne Fier.
Pas denoncimit te te ndjeres, Policia ka bere strehimin e saj ne banesen e te vellait te saj, dhe ka kerkuar menjehere prane Gjykates Fier leshimin e urdhrit te mbrojtjes.
Ligji e do qe vendimi i gjykates per urdher mbrojtje te ishte derguar brenda 24 oresh prane disa institucioneve, nje nder tyre edhe Policia.
Ky urdher mbrojtje, nuk eshte derguar kurre ne Polici, e kam frike ne asnje institucion tjeter. Ndoshta do kete mbetur ne sekretarite e gjykates, a gjithkund tjeter, por vetem ne Polici dhe institucione, nuk ka shkuar.
Kush e ka mbajtur kete urdher mbrojtje ne sirtar, eshte dhunuesi institucional, qe i la rruge te hapur dhunuesit qe i mori jeten nje njeriu.
Shpresoj te kete hetim penal, per cilindo pergjegjes qe nuk ka bere detyren, me koston e madhe te nje tjeter viktime te pafajshme nga dhuna ne familje.
*Dokument-Urdhëri i mbrojtjes i publikuar nga deputetja Majlinda Bregu
