Vëllai i Fatbardh Licit, i vrarë pak kohë më parë në Shkodër ka thënë se shteti po bashkëpunon me bandat kriminale dhe se ata janë të ngujuar. Mustafa Lici shprehet se pas vrasjes së biznesmenit dje, policia ka shkuar dhe i ka marrë me forcë djalin e ngujuar.
“Shteti po bashkëpunon me bandat kriminale. Pas vrasjes së Ferracakut kanë ardhë dhe kanë marrë në banesë djalin 15 vjeç të ngujuar. Jemi në trysni nga bandat që kanë bërë para me lekët e krimit. Ne kemi 3 javë të ngujuar jo nga bandat, por nga shteti. Për çdo vrasje po manipulohen provat. Sa ndodh ngjarje në Shkodër kapen personat e kësaj familje. Do i drejtohemi Strasburgut. Nuk na trembin as shteti as bandat. Qëndrojmë të ngujuar se e kemi kuptuar se ky shtet po lufton ndaj nesh”,- ka thënë ai.
Fatbardh Lici ishte duke pirë kafen e mëngjesit mëngjesin e së premtes së 10 gushtit në një lokal në rrugën kryesore të unazës perëndimore, kur u qëllua me 15 plumba nga një person i maskuar, identiteti i të cilit nuk është zbuluar ende.
Pak minuta pas ngjarjes policia bëri me dije se gjeti në lagjen “Dobraç” një automjet tip Benz duke u djegur, që dyshohet se mund të jetë përdorur nga autori për të lëvizur në momentin e krimit, metodë e përdorur gjerësisht nga grupet kriminale.
