Behgjet Pacolli në një intervistë për emisionin “Opinion” në Tv Klan ka rrëfyer se çfarë po ndodh me aeroportin e Vlorës. Ai tha se është i zhgënjyer prej Valon Ademit, i cili ka qenë ortaku i tij në investimin që është bërë.
Pacolli tha se i ka kërkuar Ademit të ulet dhe bisedojë. Mirëpo tashmë e tutje, ai thekoi se nuk do të ulet kurrë me të pasi e ka fyer dhe e ka kërcënuar.
“Në këtë moment jam i zhgënjyer totalisht prej zotit Ademi dhe prej zotit Lluka dhe nuk dua absolutisht të përmend emrat e tyre. E ka kontaktuar firma, departamenti juridik. I ka shkruar Ademit para se me ndodhë “pseudopubliciteti” nëpër media. Hajde të ulemi dhe bisedojmë. Unë personalisht me zotin Ademi asnjëherë nuk do të ulem për arsye se më ka fyer me telefon dhe i ka fshirë telefonatat e veta. Më ka kërcënuar mua dhe ai e ka humbur çdo kredibilitet me u ul me mua. Ai nuk guxon me ardh afër meje ku jam unë. Duhet me u larguar prej meje ose unë nuk do të shkoj kurrë atje ku është ai afër. Më ka kërcënuar, mua më ka fyer. Është kërcënimi që unë i kam fëmijët diku, e di ku i kam fëmijët. Ka kërcënuar dhe i ka fshirë ato. Unë i kam në telefon të gjitha ato që i ka fshirë menjëherë mesazhet”, tha Pacolli.
Kujtojmë se më 31 tetor 2025, për afro 4 orë, biznesmeni Behgjet Pacolli është marrë në pyetje në Prokurorinë e Tiranës, lidhur me konfliktin e lindur mes tij dhe ortakut të tij, Valon Ademi, për koncesionin e aeroportit të Vlorës.
Për këtë investim, ku sipërmarrësi Pacolli pretendon se ka 98% të aksioneve nëpërmjet kompanisë së tij “Mabco Construction S.A.”, Prokuroria e Tiranës mësohet se ka regjistruar procedim penal për veprën penale të mashtrimit me pasoja të rënda dhe mashtrimit kompjuterik.
Ky procedim penal është regjistruar mbi bazën e dy kallëzimeve, si nga ana e Pacollit, ashtu edhe nga Ademi, i cili pretendon se zotëron 49% të aksioneve përmes kompanisë “2A Group”.
Prej javësh, prokuroria po merr në pyetje persona lidhur me hetimet, por ende nuk ka persona nën hetim. Pavarësisht konfliktit mes ortakeve, Pacolli tha se mosmarrëveshjet nuk do të pengojnë përfundimin e aeroportit.
Mosmarrëveshjet mes dy ortakeve kanë çuar në pezullimin e aktivitetit të shoqërisë “Vlora International Airport”, nga Gjykata e Tiranës.
