Dy të arrestuarit për vrasjen e vëllezërve Bilali në Shkodër, 29-vjeçari Arsen Stojku dhe 23-vjeçari Mislim Rama nuk kanë pranuar krimin. Megjithatë hetuesit thonë se kanë prova të forta që implikojnë dy të rinjtë, po ashtu për të ashtuquajturin “truri” i ekzekutimeve, 26-vjeçarin Ibrahim Lici.
Bëhet fjalë për përgjime, biseda telefonike por dhe ambientale midis tre të rinjve. Po ashtu, tregojnë hetuesit, dhe në automjetin e përdorur për vrasje janë gjetur gjurmët e gishtave të të arrestuarve.
Kurse nga kamerat e sigurisë së objekteve të ndryshme në Shkodër rezulton se Rama, Stojku, Lici janë ndodhur në shoqëri me njëri-tjetrin herë pas here, para se të kryhej krimi.
Dyshohet se motiv i vrasjes së vëllezërve janë konfliktet e vjetra mes fiseve Lici dhe Bajri në këtë qytet. Njëri nga viktimat, Brahim Bilali, një ish-kampion i hipizmit ishte kryetar i Shoqatës 2 Prilli. Ndërsa Astrit Bilali ishte babai i Astmer Bilali, i arrestuar si pjesë e grupit “Bajri” në Shkodër.
Astrit Bilali ishte një biznesmen i njohur në Shkodër pasi zotëronte një resort hipizmi në zonën e Livadheve. Pikërisht në këtë resort, në 1 Shtator 2018 u vra në një atentat Arjan Ferracaku, i cili ndodhej në shoqërinë e Astmer Bilalit, që dyshohet se ishte shënjestra e atentatit. /Opinion.al
