Deputeti i PD, Gazment Bardhi, ka reaguar menjëherë pas miratimit të pikave të rendit të ditës në seancën e sotme plenare.
Ai ka kërkuar që të anulohet votimi nga Nikolla sepse sipas tij nuk plotësohej kuorumi i nevojshëm i më shumë se 70 votave.
Nga ana tjetër Nikolla iu përgjigj se në nisje të seancës 74 deputetë kishin konfirmuar prezencën.
Bardhi kundërshtoi duke thënë se prezenca e deputetëve duhet të konfirmohet para çdo votimi që bëhet në sallë, ndërsa akuzoi Nikollën se po merrte urdhërra nga Balla.
Bardhi: Ju sapo konsideruat të miratuara dy pika të rendit të ditës në kundërshtim me rregulloren. Që një votim të quhet i vlefshëm duhet të marrin pjesë 50 plus 1%. Më dëgjo mua mos dëgjo në telefon Ballën.
Në të dy pikat e rendit të ditës, morën pjesë më pak deputetë. Shpallni të anulluar të dy proceset e votimit që kaluan sepse janë në kundërshtim me rregulloren dhe kushtetutën. Nikolla kthehuni në pozicionin tuaj si kryeparlamentare, nuk janë sms-të dhe telefonatat urdhëruese për të ushtruar kushtetutën.
Nikolla: E përsëris edhe njëherë ne ishim 74 prezentë, duke siguruar kuorumin e nevojshëm vijojmë me votimet.
Bardhi: Prezenca verifikohet në çdo proces votimi. Në vendimet që miratuat ju morën pjesë 56 deputetë. Votimi që sapo bëtë është i paligjshëm anti-kushtetues dhe e konsideroj të pavlefshëm.
