Komisionin Parlamentar për Ekonominë dhe Financat ka shyrtuar sot kontratat koncensionare për ndërtimin e rrugëve Milot-Balldren dhe Porti i Jahteve-Orikum-Dukat.
Kryetari i Komisionit Arben Ahmetaj kërkoi më herët në komision informacion më të saktë në lidhje me kostot e aksit Milot-Balldren, i cili pritet të kushtojë 217 milion euro.
“A janë këto çmime në përputhje të plotë me manualet që përdor qeveria për investime publike? A keni mundësi të na bëni një krahasim me një urë të ngjajshme në rajon si kjo e Matit, dhe kostos së një km vepër të rrugës me një km të një rruge në vende të tjera të rajonit’,- pyeti Ahmetaj.
Artan Shkreli si përfaqësues i ministrisë tha se “Koncesioni po jepet për projektim, ndërtim dhe mirëmbajtje. Oferta totale fillestare ishte 217 mln e 18 mijë e 500 euro, ndërsa në përfundim shkon mbi 300 milion euro pasi u përfshi edhe mirëmbajtja”
Megjithatë kontrata koncensionare për këtë aks u votua nga Komisioni vetëm me votat e mazhorancës ndërsa përfaqësuesit e opozitës parlamentare votuan kundër.
Sipas kontratës së koncensionit rruga do të ndërtohet me paratë e kompanisë private dhe qeveria do të shlyejë me këste për 13 vjet duke përfshirë koston e ndërtimit dhe interesat që do ti paguhen kompanisë.
Opozita ka denoncuar këto dy projekte për kostot e larta të ofertës financiare për ndërtimin dhe mirëmbajten. Aksi Milot-Balldren pritet të kushtojë 217 milionë euro plus TVSH për 17 kilometra. Ndërsa aksi që kalon nga Bypass i Orikumit do të kushtojë 67 milionë euro plus TVSH për 14.7 kilometra rrugë. /Opinion.al
