Seanca e sotme parlamentare nisi një orë me vonesë. Shkak u bë mbledhja e grupit parlamentar socialist të cilët diskutuan rreth kandidaturës së kreut të KLSH-së të propozuar nga Presidenti Meta dhe që u miratua në Komisionin e Ekonomisë.
Shtyrja përtej afateve e seancës që ishte parashikuar të niste në orën 10:00, nuk është pritur mirë nga deputetë të opozitës në parlament.
Deputeti Halit Valteri kërkoi që një gjë e tillë të mos përsëritet më pasi Kuvendi siç tha ai nuk është selia e PS-së dhe i rikujtoi kryeparlamentarit Ruçi se deputetëve i hiqet fjala për një minutë gjatë seancave.
“Ky është parlamenti i Shqipërisë dhe jo selia e PS-së. Seanca ka filluar në 11:00, ndërkohë që duhet të niste në 10:00. Nëse këta nuk kanë kohë të mblidhen 2 orë para për pazarin që po bëni me Metën për t’i dhënë KLSH-në nuk është faji ynë apo i shqiptarëve. Ju për një minutë i hiqni fjalën deputeteve dhe një orë dhunohet Kuvendi se ka mbledhje PS-ja, në emër të grupit ju kërkojmë të mos përsëriten më këto situata.
Në përgjigje të kësaj vërejtjeje, ka reaguar kreu i Kuvendit, Gramoz Ruci, duke thënë se një gjë e tillë nuk do të përsëritet më.
“Nuk do përsëritet më, e thashë edhe në nisje të seancës. Eshtë e drejtë ekskluzive e cdo grupi parlamentar të kërkojë ndërprerje e seancës deri në nje orë, por nuk ishte ky rasti, nuk do përsëritet më”- tha ai./ Opinion.al
