Aktualitet

Von der Leyen: Nuk ka shenja pozitive për Tiranën dhe Shkupin


               Publikuar në : 18:15 - 17/10/19 |
geliano fataj

Presidentja e Komisionit Evropian, Ursula von der Leyen ka folur në lidhje me negociatat me Tiranën e Shkupin, duke u shprehur se sinjalet janë negative.

Në Bruksel, ka nisur samiti i liderëve të BE-së, ku temë kryesore diskutimi janë Brexit, negociatat dhe lufta e nisur nga Turqia me kurdët. Leyen ka deklaruar se nuk ka shenja pozitive për një vendim për hapjen e negociatave gjatë mbledhjes së liderëve të BE-së, duke shuar kështu shpresat.

“Fatkeqësisht, nuk ka shenja pozitive për një vendim për fillimin e negociatave të pranimit në BE për Shqipërinë dhe Maqedoninë Veriore. Më vjen shumë keq sepse besoj me vendosmëri se të dy vendet kanë bërë përpjekje të mëdha për të ecur më afër standardeve evropiane dhe meritojnë një sinjal pozitiv,” theksoi Von der Leyen.

Nga ana tjetër, Presidenti i Parlamentit Europian, David Sassoli është takuar me liderë të ndryshëm të Bashkimit Europian dhe të shteteve anëtarë gjatë Këshillit Europian, me të cilët ka diskutuar edhe për anëtarësimin e Shqipërisë dhe Maqedonisë së Veriut. Sassoli theksoi se kërkoi nga liderët që të mbajnë premtimet dhe të çelin negociatat për të dyja vendet. Ndjekim fjalën e tij.

“Kemi folur për Maqedoninë e Veriut dhe Shqipërinë, që janë dy vende që kanë kërkuar çeljen e negociatave. E dimë që ka qëndrime të ndryshme për këtë, por qëndrimi ynë është që t’u japin dritën e gjelbër. Ne mendojmë se nëse Bashkimi Europian kërkon sakrifica dhe ndryshime, dhe nëse ato sakrifica dhe ndryshime implementohen, ne duhet të mbajmë fjalën e dhënë dhe premtimet”, u shpreh ai./ Opinion.al

Pas