Vlora nis sot sezonin turistik. Kryetari i bashkisë, Dritan Leli thotë se, “sezoni turistik i këtij viti do të jetë sezoni më suksesshëm se ai një viti më parë dhe destinacioni i të gjithë shqiptarëve dhe jo vetëm për verën e këtij viti do të jetë Vlora”.
Por duket se Vlora nuk ofron siguri. Këtë të premte, në mes të ditës, në një nga zonat me të populluara të këtij qyteti ka ndodhur një atentat. Përplasja ka ndodhur në zonën e Lungomares, ndërsa një person është paraqitur në spital me plagë në këmbë.
Ndërkohë policia thotë se ka nisur hetimet për zbardhjen e rrethanave të ngjarjes. Nga ana tjetër në fshatin Babicë është gjetur një automjet i djegur, që dyshohet se është përdorur nga autorët.
Një ditë më parë, Prokurorja e Përgjithshme e Përkohshme, Arta Marku tha se Vlora është qyteti me kriminalitetin më të lartë në vend.
“Rrethi me kriminalitetin më të lartë është Vlora. Kriminalitet të lartë paraqet Shkodra, Elbasani dhe qytetet e tjera më pas”, u shpreh Marku në një intervistë televizive./Opinion.al
