Presidenti Ilir Meta ka folur në lidhje me situatën e krijuar nga koronavirusi dhe për mënyrën se si ajo po menaxhohet nga qeveria.
Gjatë një interviste televizive, Meta ka vlerësuar qëndrimet e partive të opozitës gjatë pandemisë, duke thënë se rrija e numrit të testimeve ka qenë një kërkesë e drejtë.
“Vlerësoj se opozita kanë qenë mjaft aktive gjatë kësaj kohe dhe kanë dhënë mendimet e tyre, madje kanë respektuar kufizimet. Pra asnjëherë nuk i kanë kundërshtuar kufizimet si masë mbrojtëse për shëndetin e qytetarëve. Kërkesa e tyre për shtimin e testimeve ka qenë një kërkesë tërësisht e drejtë. Sa i përket pretendimeve të tyre për çështjen e tenderave, gjykoj se fjalën për këtë duhet ta thotë drejtësia”,- tha kreu i shtetit.
Meta deklaroi se institucionet duhet të bëjnë përpjekje më të mëdha për të mbrojtur bizneset dhe punonjësit, gjatë situatës së pandemisë.
“Jemi në një situatë të vështirë të një fatkeqësie, që duhet përballuar me masa të përgjegjshme dhe efikase, me një balancë midis shëndetit publik dhe mbrojtjes së ekonomisë kombëtare e të qytetarëve shqiptarë. Të bëhen përpjekje më të mëdha për të mbrojtur bizneset dhe punonjësit të tyre që rrezikojnë të humbasin vendet e punës”.
Në lidhje me ndryshimet në Kodin Penal, Meta tha se nuk ka konstatuar asnjë akt anti-kushtetuese në këto ndryshime, ndërsa shton se me dekretimin e tyre u plotësua një boshllëk në Kodin Penal.
“Nuk ka patur asgjë anti-kushtetuese në këto ndryshime të miratuara në Kodin Penal, përkundrazi ka patur një boshllëk. Unë besoj që ato dispozita të ndryshuara që janë miratuar me propozim të Presidentit të Republikës janë me standardet më të avancuara europiane, veçanërisht krahasuar me ato daneze”./ Opinion.al
