Kryesore

Vijon debati për Kushtetuesen, Ruçi mbledh Këshillin e Legjislacionit


               Publikuar në : 11:28 - 11/11/19 |
Al Do

Debati për zgjedhjen e anëtarëve të Gjykatës Kushtetuese vazhdon sot në seancën parlamentare.

Kryetari i Kuvendit ka vendosur të mbledhë Këshillin e Legjisalcionit për të diskutuar kushtetutshmërinë e procesit.

“Kam kërkuar që të thirret këshilli i legjislacionit mbi kushtetuetshmërisë. Në kuvend nuk mund të diksutohet rreth kandidaturave. Janë diskutuar kur kanë aplikuar, nga organi i emërtesës (KED). Kuvendi vetëm voton. Këshilli i legjislacionit do të diskutojë kushtetuetshmërinë”, tha Ruçi.

Por pse ka ende pikëpyetje mbi procesin?

Përpara nisjes së seancës së sotme Presidenti Ilir Meta dërgoi një mesazh për deputetët duke iu kërkuar të lexojnë Kushtetutën përpara se të veprojnë sot. Disa ditë më parë ai i kërkoi KED të pezullojë procesin e zgjedhjes së kandidaturës për Gjykatën Kushtetuese pasi sipas tij radhën për tu shprehur e ka Kuvendi.

Sipas Kushtetutës anëtarët e Gjykatës Kushtetuese emërohen sipas radhës nga Presidenti, Kuvendi dhe Gjykata e Lartë. Më 15 tetor Presidenti zgjodhi Besnik Muçin si anëtarin e ri të Gjykatës Kushtetuese. Në lidhje me emërimin e vakancës së dytë ai nuk u shpreh pasi radhën e ka Kuvendi.

Nga ana tjetër përfaqësuesit e mazhorancës, konkretisht kryetari i Komisionit të ligjeve, Ulsi Manja tha se ligji për Gjykatën Kushtetuese e zgjidh situatën nëse institucioni i presidentit nuk shprehet duke emëruar anëtar automatikisht të renditurin e parë në listën që dorëzon KED, në rastin konkret Arta Vorpsin.

Në seancën e sotme Kuvendi e ka marrë të mirëqenë emërimin e Vorpsit në Kushtetuese por ajo nuk mund të marrë detyrën pa u dekretuar nga Presidenti. Në listën me 3 kandidatë që ka dërguar KED për njërën nga vakancat (1-Arta Vorpsi, 2-Elsa Toska, 3-Besnik Muçi) dy nga tre kandidatët janë tashmë të emëruar kështu që Kuvendi ka vetëm një mundësi zgjedhjeje. E njëjta situatë paraqitet edhe për vakancën e dytë. Këtë gjë e pranoi edhe Ulsi Manja gjatë fjalës së tij në Kuvend kur pranoi se do të votohet vetëm për dy zonja.

Doja t’i bëja një pyetje presidentit: E supozojmë se do të zbatojmë radhën. Të parin e ka dekretuar presidenti, të dytin po e votojmë ne sot, radha nuk i shkon presidentit për të tretin, e ka gjykata e Lartë por që nuk e voton dot. Atëherë çfarë do bëjmë sipas presidentit do bllokojmë Gjykatën Kushtetuese dhe për një vit? Arsyetimi i presidentit nuk është dashamir por dashakeq. Është momenti që këto dy zonja që do t’i votojmë pak më vonë t’i mbështesim.”- tha Manja.

Por sipas Kushtetutës që një institucion të zgjedhë anëtarin e Gjykatës Kushtetuese duhet të ketë të paktën 3 kandidatura dhe nëse do të konsiderohen të tilla ato që tashmë janë emëruar kjo është një cështje që duhet interpretuar nga institucionet përkatëse që në fakt është Gjykata Kushtetuese e cila nuk funksionon. /Opinion.al

Pas