Një karton i verdhë dhe zero gola. Graziano Pelle e ka filluar aty ku e kishte lënë. Madje, këtë herë me një penallti më pak sepse të vetmin 11-metërsh të ndeshjes nuk ia kanë lënë atij ta gjuajë. Debutimi i sulmuesit italian në Kinë ka përfunduar me një barazim (1-1), që ka lënë skuadrën e Shandong Luneng në vendin e tretë nga fundi i renditjes, në kuotën e 17 pikëve pas 18 ndeshjesh. Qendërsulmuesi i kombëtares Italiane, i cili sapo është transferuar në Kinë nga Southampton dhe ku do të përfitojë 15 milionë euro në sezon, nuk ka arritur të bëjë diferencën në ndeshjen e parë të luajtur në kampionatin kinez.
Pasi është kthyer nga pushimet e shkurtra në Amerikën e Veriut (mes Shteteve të Bashkuara dhe Kanadasë), Pelle është zhytur menjëherë në realitetin e ri dhe 5 ditë pas blerjes së tij ka zbritur në fushë me skuadrën e re në një ndeshjes mes dy ekipeve që luftojnë për mbijetesë. Shandong, që ka kaluar në disavantazh në minutën e 36’, ka barazuar në minutën e 45-të falë Montillo-s: trajneri Magath, me sa duket, nuk ka dashur t’ia besojë penalltinë lojtarit më të paguar të ekipit, ndoshta për shkak të 11-metërshit të humbur nga italiani kundër Gjermanisë. Pelle ka qëndruar në fushë për 90 minuta, por, në vend të golit të shumë pritur, ka gjetur vetëm një karton të verdhë, të marrë në minutën e 72-të, pikërisht si në ndeshjen e fundit të Europianit.
