Dy persona janë arrestuar nga policia ndërsa një tjetër është shpallur në kërkim gjatë një operacioni të policisë në Kurbin ku u zbulua një shtëpi që përdorej për kultivimin e lëndëve narkotike.
Autoritetet bëjnë me dije se janë arrestuar Dean Gega, 28 vjeç i cili kultivonte lëndën narkotike dhe Xhovani Ndreca, 53 vjeç me detyrë faturist pranë OSHEE Kurbin pasi dyshohet se i ka ndihmuar dy të rinjtë për të fshehur lidhjet e paligjshme të energjisë.
Këta persona, në bashkëpunim me njëri-tjetrin, në Fushë Milot, Kurbin, kishin përshtatur katin e parë të banesës së shtetasit Y. P., me aparatura që shërbejnë për kultivimin e bimëve narkotike. Gjatë kontrolllit në banesë u konstatua se këta shtetas kishin bërë lidhje të paligjshme të energjisë elektrike, si dhe kishin ndërtuar një dhomë shtesë, pa leje.
Ndërkohë në kërkim është shpallur bashkëpunëtori i Gegës, Ylli Pali, 24 vjeç i cili është gjithashtu pronari i banesës, kati i parë i të cilës ishte përshtatur në laborator droge.
Gjatë kontrollit në këtë ambient u gjetën dhe u sekuestruan 271 bimë të dyshuara narkotike cannabis sativa të kultivuara në vazo, 2 kilogramë e 500 gramë lëndë e dyshuar narkotike cannabis sativa, pajisje elektrike, llamba elektrike termale, lëndë ushqyese për kultivimin e bimëve narkotike etj.
Nën drejtimin e Prokurorisë Kurbin, vijon puna për identifikimin dhe kapjen e personave të tjerë të përfshirë në këtë veprimtari kriminale.
Materialet i kaluan Prokurorisë pranë Gjykatës së Shkallës së Parë Kurbin, për veprime të mëtejshme./Opinion.al
