Bota

Video/Vrasje me pagesë, ekzekutuesit e gazetarit dyshohet se janë të huaj


Bëhu pjesë e Grupit Zyrtar të Opinion.al
>> KËTU <<
               Publikuar në : 17:31 - 11/04/21 |
Opi Nion

Policia po shqyrton në detaje videon e nxjerrë nga kamerat e sigurisë, duke shpresuar se do të jetë në gjendje të mbledhë informacione të reja në lidhje me vrasjen gjakftohtë të gazetarit George Karaivaz në Alimos.

Pamjet tregojnë dy vrasësit që largohen nga vendngjarja, disa sekonda pasi George Karaivaz mbeti i vdekur nga armët e tyre.

Autoritetet duket se po konsiderojnë seriozisht mundësinë që vrasja e gazetarit të njohur të ishte vrasje me pagesë, ndërsa në të njëjtën kohë vlerësohet se ekzekutorët janë shtetas të huaj.

Në fakt, siç raportoi një burim i EL.AS për CNN grek, vrasësit e reporterit të policisë mund të mos e dinin kush ishte viktima e tyre. Skenari mbizotërues dyshohet të jetë ai i zbatimit në mënyrë të përpiktë të një vrasjeje me pagesë.

Dyshimet e Policisë drejtohen në njerëz të botës së krimit, ndërsa si ekzekutorë të vrasjes ata mendojnë se janë persona të paguar. Informacionet thonë se mund të ketë qenë dikush që i informoi autorët e krimit se George Karaivaz po i afrohej shtëpisë në makinën e tij, çka do të thotë se në krim kishte edhe bashkëpunëtorë të tjerë.

Në ditët në vijim, policia do të marrë deklarata nga familja dhe bashkëpunëtorët e tij, duke u përpjekur të zbulojë nëse ai kishte marrë kërcënime dhe kush qëndron pas vrasjes.  Autoritetet po vendosin gjithçka nën “mikroskop” në lidhje me aktivitetet e gazetarit, hetimet dhe raportimet, në mënyrë që ata të mund të nxjerrin konkluzione nëse dikush e shqetësoi atë dhe pse.

Varrimi i gazetarit të njohur u mbajt në orën 15:00 në fshatin ku ai ka lindur, Kallifito, Drama.

Ekzaminimi mjeko-ligjor: Vrasje me 10 plumba

Ekzaminimi mjeko-ligjor, i cili dje u bë publik, vërteton gjithashtu dyshimet e një vrasjeje me pagesë. Kujtojmë që gazetari mori gjithsej 10 plumba. Mjeku ligjor zbuloi se gjashtë plumba goditën George Karaivaz në gjoks, një në qafë, dy plumba në kokë, ndërsa ai që u gjet në pëllëmbë me sa duket vinte nga një lëvizje spazmatike e gazetarit,  një reagim instiktiv kur ai u kap në befasi.

“… Prania e ekzekutorit dhe vendet ku u gjetën plumbat në trupin e gazetarit nuk na lënë dyshime për të menduar për asgjë tjetër. Qëllimi nuk ishte të frikësonte ose të dërgonte një mesazh. Kushdo që qëndron pas vrasjes është e qartë se ai e donte George Karaivaz të vdekur”, tha një zyrtar i lartë i EL.AS për CNN grek.

Çfarë tregoi prova e parë për armën

Arma e përdorur në vrasjen e gazetarit George Karaivaz, me ekzaminimin e parë laboratorik tregon se nuk ishte përdorur në një akt tjetër kriminal. Sidoqoftë, autoritetet po kryejnë një ekzaminim të dytë për të konfirmuar rezultatin që pistoleta është “e pastër”.

Sidoqoftë, ky ishte një rezultat që nuk e befasoi policinë, e cila që në momentin e parë priste që ekzekutorët të përdornin një armë që nuk ishte përfshirë në një akt tjetër kriminal./Opinion.al

Pas