Ish-Kryeministri i Britanisë, Tony Blair, këtë të premte ka marrë në dorë situatën e krijuar në Britaninë e Madhe që pas vendimit për largimin nga Bashkimi Evropian.
Ai promovoi sot misionin e tij për mobilizimin e shoqërisë në mënyrë që të ngrihen kundër “Brexit”.
Gjatë një fjalimi në Londër, Bler tha se britanikët kanë votuar në referendum, pa pasur njohuritë e duhura për pasojat e largimit të vendit nga unioni dhe qartësoi se synimi i tij është që të bindë bashkëkombësit se ky vendim është i gabuar.
Ai me këtë rast ju bëri thirrje votuesve që të kundërshtojnë vendimin e Qeverisë në Londër se Britania duhet të largohet me çdo kusht nga unioni, ngase sipas tij, një veprim i tillë do të mund të ishte i dëmshëm për gjeneratat e ardhshme.
Bler, i cili ka qenë kryeministër i Britanisë nga viti 1997 deri në vitin 2007, ka mbështetur fushatën për mbetjen e Britanisë në Bashkimin Evropian.
Ish-kryeministri i Britanisë ndër të tjera tha se përkundër faktit se mbështetë vendimin që kanë marrë britanikët në referendum, nuk duhet të injorohen mbi 16 milionë britanikë, të cilat kanë votuar për atë që vendi të mbetet pjesë e unionit.
Ndërkohë, Presidenti i Komisionit të Evropës, Zhan Klod Junker, tha se beson se do të nevojiten më shumë se do vjet për të kompletuar të gjitha marrëveshjet për finalizimin e largimit të Britanisë nga unioni.
https://youtu.be/evIjJjyLVmc
Siç dihet, kryeministrja e Britanisë, Theresa May, ka paralajmëruar se në mars do të aktivizoi nenin 50 të marrëveshjes së Lisbonës, pas aktivizimit të së cilit do të filloi procesi dyvjeçar i negociatave për Brexit.
Junker tha se Britania do të jetë e detyruar që të ndryshoi mbi 20 mijë ligje, me qëllim që të largohet sa më shpejtë nga unioni dhe se Londra nuk ka të drejtë të arrijë marrëveshje për tregti dypalëshe me shtetet tjera, përderisa është ende pjesë e Bashkimit Evropian.
