“Nesër në orën 13:00 hidhen pagat”, kështu deklaroi kreu i sindikatës të naftëtarëve, Kamber Iljazi përpara protestuesve pas një takimi në Ministrinë e Energjetikës. Por protestuesit kanë thirrur në kor: JO JO JO! Nuk kemi besim tek qeveria, pagat i duam sot, u shprehën ata. Sakaq protesta vazhdoi edhe për të paktën 1 orë përpara Ministrisë së Energjetikës. Por Policia e Shtetit, ndërhyri me forcë duke shpërndarë protestuesit që kishin ardhur në këmbë nga Fieri e Ballshi për të protestuar në Tiranë. Në fund policia ia doli ti shpërndajë, duke shoqëruar njërin prej tyre në komisariat. Naftëtarët thanë se nëse paga e muajit nëntor nuk u hidhet neser në bankë nga punëdhënësi, protesta do të rinisë.
Sot paradite, ministrat Gjiknuri e Ahmetaj priten një përfaqësi të protestuesve dhe të sindikatave. Gjithashtu në takim ishte edhe administratori i kompanisë private që ka ARMO-n. Naftëtarët kërkojnë pagat e nëntorit dhe dhjetorit të këtij viti, po ashtu dhe 13 paga të prapambetura ndër vite nga kompani të tjera që kanë menaxhuar uzinën.Për këto të fundit janë në proces gjyqësor. Naftëtarët gjithashtu kërkojnë rifillimin e punës në uzinë dhe statusin e naftëtarit.
Ministria e Energjetikës në një njoftim për mediat deklaroi se rafineria është një ndërmarrje private, e për pasojë është detyrim ligjor dhe kontraktual i punëdhënësit privat të respektojë detyrimet. Me kërkesë të Sindikatës së Naftëtarëve, në takim u ftua dhe mori pjesë edhe administratori i kompanisë private IRTC, i cili garantoi përfaqësinë e punonjësve se brenda ditës së nesërme do të paguajë pagën e plotë të muajit Nëntor.
Në lidhje me Statusin e Naftëtarit, përfaqësia e punonjësve të Rafinerisë së Naftës në Ballsh do të punojë ngushtësisht me grupin e punës të ngritur nga Ministria e Infrastrukturës dhe Energjisë për të përmbyllur në një kohë sa më të shpejtë aplikimet ligjore për përfitimin e statusit.
Në të njëjtën kohë, kërkesës së punonjësve për ngritjen e një pavioni të specializuar për sëmundjet profesionale të naftës në Spitalin e Fierit, ministrat Gjiknuri dhe Ahmetaj iu përgjigjën me garancinë se plani i investimeve në sektorin e shëndetësisë në Qarkun e Fierit do të marrë përmbajë edhe këtë prioritet, deklaroi ministria.
