Zlatan Ibrahimovic ka kaluar tek Juventus nga Ajax-i në 2004-ën dhe ka qëndruar për dy vite me gjigantët italianë, duke fituar dy kampionate, që më pas janë hequr për shkak të ‘calciopoli’. Nedved ka qenë një nga lojtarët më të rëndësishëm të atij ekipi, i cili është tërhequr nga futbolli si bardhezi në 2009-ën, pas tetë viteve të kaluara në Torino. Ish-mesfushori ka zbuluar se suedezi ka qenë shoku më i mirë i ekipit që ka pasur në karrierën e tij. “Për sa i takon shokëve të skuadrës, kam pasur shumë dhe nuk dua të ofendoj asnjë”, ka thënë Nedved. “Nëse do të më duhej të veçoja njërin prej tyre, do të thoja Zlatan Ibrahimovic. Ai është një sulmues që mund të çajë çdo mbrojtje, ka një forcë dhe gjatësi të frikshme, pa harruar aftësitë e mëdha teknike”.
Por edhe Ibrahimovic kishte nevojë për disa rregullime. “Kur ka ardhur tek Juventus nuk arrinte të finalizonte. Sulmuesi që shihni sot ka qenë meritë e Fabio Capello-s, i cili e ka detyruar të ushtrojë gjuajtjen e tij 30 minuta pas çdo seance stërvitore”. Legjenda e futbollit çek ka zbuluar se do t’i kishte pëlqyer të luante edhe për Manchester United, klubi ku Ibrahimovic luan aktualisht. “Një peng? Që nuk kam luajtur kurrë për Manchester United, do të më kishte pëlqyer. Por nuk është krijuar asnjëherë mundësia, vetëm Chelsea është interesuar”.
“Më pëlqen brezi i Paul Scholes dhe Ryan Giggs, të cilin e adhuroja. Kam qenë pak xheloz për Karel Poborsky, i cili ka luajtur te Manchester dhe ka përjetuar disa ndeshje të mëdha”, ka përfunduar Nedved.
