Një drejtues mjeti në kryeqytet është penalizuar për shkak të vendimit të tij për të ndjekur autoambulancën që ishte në shërbim emergjence.
Në një video të publikuar nga Policia e Shtetit shihet se mjeti me sa duket ka shfrytëzuar rrugën e hapur nga autoambulanca dhe e ka ndjekur në vijim për të shmangur trafikun.
Policia e ka penalizuar me 30 mijë lekë gjobë dhe heqje të patentës për 12 muaj.
Njoftimi nga policia
Ndiqte ambulancën e cila ishte në shërbim emergjence, procedohet me masë administrative dhe pezullim të lejes së drejtimit drejtuesi i automjetit.
Policia Rrugore e Tiranës në vijim të kontrolleve të ushtruara për rritjen e parametrave të sigurisë rrugore, në rrugën interurbane Durrës-Tiranë, ka konstatuar dhe ndaluar një automjet që ndiqte ambulancën e cila ishte në shërbim emergjence.
Ndaj drejtuesit të automjetit u vendos masa administrative 30000 lekë të rinj si dhe *pezullimi i lejes së drejtimit 12 muaj*.
Policia Rrugore e Tiranës apelon që drejtuesit e mjeteve të tregojnë kujdes në raport me rregullat e qarkullimit rrugor dhe veçanërisht për të mos ndjekur nga afër dhe shfrytëzuar progresionin e lëvizjes së mjeteve të emergjencave, me sisteme zanore dhe pamore ndezur.
