Teksa ka ende studentë që vijojnë rezistencën e tyre, disa efektivë të Policisë së Shtetit kanë hyrë sot në ambientet e Fakultetit Histori Filologji. Lidhur me situatën ka reaguar pedagogu Mark Marku, i cili tha se me policë mund të tremben vetëm fëmijët. Profesor Marku ka ndjekur policët me celular në duar, duke filmuar lëvizjet e tyre në oborrin e fakultetit.
“Thanë që ishin këtu për të ruajtur qetësinë dhe rendin, dhe unë i thashë që është shumë e qartë se ndalohet hyrja e policisë në ambientet universitare. Situata ishte shumë e qetë, e bëjnë për të hequr vëmendjen nga protesta. Ska pasur asnjë arsye që të ishin këtu.
Asambleja u mblodh dje dhe u vendos që kjo javë të jetë javë proteste, dhe në rast të mos reagimit nga qeveria edhe javën e ardhshme dhe në vijim do të kemi një ditë të caktuar që të protestojmë. Ne nuk iu bëjmë presion studentëve, dhe ata mund të vijojnë me protestën e tyre.
Gjendja po rëndohet gjithnjë e më shumë, problematika zgjidhet dhe asgjë nuk është zgjidhur, qysh sot do marrim nismën ligjore në drejtim të efektivëve të policisë që hynë në ambientet e Fakultetit. Është absurde, mund të frikësohen fëmijët me policët, është qesharake fare. Po bëhen të rrezikshëm në momentin që shkelin ligjin”, u shpreh Marku për Fax news.
