Kryetarja e Lëvizjes Socialiste për Integrim, Monika Kryemadhi, të hënën i ka bërë thirrje ministrit të Brendshëm, Fatmir Xhafaj të hetojë shefin e Komisariatit të Rinasit për ndalimin, dhunën dhe fyerjet e ushtruara ndaj 8 vajzave të LRI-së.
Në një deklaratë për mediat, Kryemadhi tregoi për ndalimin e tetë vajzave të reja në Aeroportin e Rinasit, të cilat u ndaluan vetëm për arsyen se i kishin nxjerrë disa parulla kryeministrit Edi Rama në Bruksel, teksa i bënin thirrje të largohet dhe të mos kthehet më.
Ajo theksoi se kryeministri Rama, i cili është një njeri që nuk pranon të shikojë parulla të tilla, urdhëroi dhe arrestimin e vajzave të reja.
“Edi Rama urdhëroi arrestimin e tetë vajzave të reja sepse rrugës për të pirë kafe në Bruksel dhe më pas në Nju Jork, i kishin dalë me një parullë që i bënin thirrjen për t’a ndërgjegjësuar atë që të iki dhe të mos kthehet më”,- u shpreh Kryemadhi.
Më herët, fjalën e saj kryetarja e LSI-së e hapi me ngjarjen e ditës së sotme në Kuvendin e Shqipërisë, ku theksoi se ishte një ditë e turpshme për parlamentarizmin shqiptar.
Sipas saj, paligjshmëria filloi që kur Garda e Republikës hyri në sallë, pa urdhërin e kryetarit të Kuvendit, por vetëm me një shenjë të kryeministrit.
Monika Kryemadhi: Sot ishte një ditë e turpshme për parlamentarizmin shqiptar. Paligjshmëria filloi që kur Garda e Republikës hyri në sallë, pa urdhërin e kryetarit të Kuvendit, por vetëm me një shenjë të kryeministrit.
Hyrja e Gardës së Republikës në sallën e Kuvendit është shkelje e ligjit, por mbi të gjitha tregon hapur se çdo ditë e më shumë në Shqipëri po instalohet një juntë e krimit të organizuar.
Antikushtetutshmëria, paligjshmëria dhe kriminaliteti tashmë janë bërë një tipar dallues i qeverisjes së Edi Ramës në Shqipëri, gjë e cila u pa edhe sot.
Mirëpo, përpara mediave nuk jam prezent për t’iu ripërsëritur shqiptarëve atë se çfarë ndodhi paradite në sallën e Kuvendit të Shqipërisë, por jam këtu për një fakt tjetër në vazhdën e imoralitetit, të papërgjegjshmërisë dhe sjelljes kriminale të qeverisë së Edi Ramës.
Ai urdhëroi arrestimin e tetë vajzave të reja sepse rrugës për të pirë kafe në Bruksel dhe më pas në Nju Jork, i kishin dalë me një parullë që i bënin thirrjen për t’a ndërgjegjësuar atë që të iki dhe të mos kthehet më.
Edi Rama nuk është mësuar të shikojë parulla të tilla, por është mësuar të shikojë se sa shumë e duan Edi Ramën, por në fakt shqiptarët nuk e duan më.
Por ai urdhëroi arrestimin e vajzave dhe urdhëroi ushtarët e drogës, shefin e komisariatit të Rinasit, që jo vetëm ti ndalojë ato, por edhe t’i dhunojë e ti fyejë.
E Ftoi zyrtarisht z. Fatmir Xhafaj, me të njëjtën ndjeshmëri si prind dhe me përgjegjshmërinë e detyrës, që kreu për ndërhyrjen dhe lirimin e vajzave të LRI-së, të hetojë edhe shefin e Komisaritatit të Rinasit, për dhunën dhe fjalorin banal që ka ushtruar ai.
