Gardiani i burgjeve Elton Lala, i arrestuar tri ditë më parë bashkë me një person tjetër me 8.6 kilogramë drogë në makinë, dyshohet se do të luante rolin e korrierit të drogës. Polici i burgjeve dhe miku i tij u arrestuan nga policia gjatë një operacioni antidrogë, në periferi të Tiranës.
Polici i Burgut 313, Elton Lala, 29 vjeç, u arrestua bashkë me shtetasin Shkëlzen Duçka, kur po tentonin të transportonin 8.6 kg hashash në drejtim të Elbasanit.
Mësohet se gardiani e ka hedhur poshtë akuzën dhe nuk ka pranuar asnjë dijeni në lidhje me drogën.
Ai e ka shpjeguar ndodhjen e tij me personin tjetër dhe në makinën me drogë, vetëm si pasojë të lidhjeve shoqërore dhe njohjeve personale.
Nga ana tjetër, burimet e hetimit kanë pohuar se kishin më
se 20 ditë që ishin vënë në ndjekje të policit të burgjeve dhe grupit të tij, pas informacioneve që kishin marrë në lidhje me lëvizjen e drogës.
Gardiani bashkë me mikun e tij ranë në pranga, pasi në makinën e tyre u gjetën dy qese të mbushura me bimë narkotike, e cila pas peshimit rezultoi se ishte 8.6 kilogramë.
Në momentin e arrestimit ka qenë vetë Elton Lala u është drejtuar oficerëve të Antidrogës, duke u
thënë: “Jam polic edhe unë. Kam pistoletë”.
Më pas, agjentët e Antidrogës e kanë kontrolluar, duke i gjetur e bllokuar pistoletën tip “TT” dhe dokumentin që vërtetonte se ai ishte punonjës i Drejtorisë së Burgjeve.
Referuar hetimeve të Policisë, mësohet se gardiani 29vjeçar ishte implikuar kësaj radhe për herë të parë në transportimin e lëndës narkotike.
Duke qenë gardian burgjesh dhe efektiv i policisë së burgjeve, mendohet se ai do të përdorej për të bërë transportimin e ngarkesës së drogës në Tiranë dhe në Elbasan.
Implikimi në këtë aktivitet i gardianit të Burgut 313 mësohet se është bërë me kërkesë të poseduesve të drogës, me qëllim shmangien e rrezikut të kontrolleve apo të kapjes nga policia
Por, nga ana tjetër, ka qenë sektori i Antidrogës që kishte marrë informacion dhe po mbikëqyrte lëvizjet e gardianit dhe mikut të tij, shtetasit Shkëlzen Duçka.
Policia e Tiranës njoftoi tri ditë më parë se seksioni Kundër Narkotikëve, mbi bazën e informacioneve të marra në rrugë operative, ka arritur të dokumentojë veprimtarinë e paligjshme në fushën e narkotikëve të dy shtetasve, të cilët u kapën në flagrancë në dalje të Tiranës, në afërsi të një qendre tregtare.
Sipas Policisë, aktivitetin e paligjshëm në drejtim të prodhimit dhe shitjes së narkotikëve, këta dy shtetas e ushtronin kryesisht në dalje të kryeqytetit, në zonën e Farkës.
Në momentin që dy të dyshuarit janë konstatuar nga policia kanë qenë jashtë automjetit dhe ndërkohë njëri prej tyre, Elton Lala, ka nisur të largohet në këmbë në drejtim të rrethrrotullimit TiranëElbasan.
Policia tha se gjatë kontrollit të ushtruar në bagazhin e mjetit tip “Benz”, me targë “TR 5686 I”, janë gjetur dy qese të zeza të ngjitura me izolant me lëndë bimore të dyshuar kanabis sativa./ Panorama.al
http://www.dailymotion.com/video/x3vuh0k_arrestohet-polici-i-burgjeve_news
