Lideri demokrat Lulzim Basha deklaroi sot se personi që përplasi makinën e policisë në Elbasan është larguar nga Shqipëria. “Sot Rama jep llogari bandave se me ata e siguroi votën. Të dyshuarit në makinën e blinduar që përplasi policinë në Elbasan, me ndihmën e të korruptuarve janë larguar dhe gjenden në një vend anëtar të BE-së”- tha Basha, duke theksuar se vetëm vota e lirë është e vetmja që mund të shpëtojë vendin.
Në lidhje me ngjarjen e rëndë të 18 Shtatorit në Elbasan, ku një Audi A 8 i blinduar goditi makinën e zv/drejtorit të Policisë së Elbasanit, Gjergji Oshafi është arrestuar një autor i dyshuar, Enea Bekteshi 28 vjeç. Ai ka pranuar në gjykatë se ka qenë në drejtimin e mjetit dhe nën efektin e lëndëve narkotike.
Por nga ana tjetër, Partia Demokratike që ishte e para që e publikoi ngjarjen e Elbasanit është shprehur se banda drejtohet nga Suel Cela dhe dhëndri i Qazim Sejdinit, Sokol Sanxhaktari. Emrat e këtyre dy personave nuk janë përmendur asnjëherë nga policia në lidhje me këtë ngjarje edhe pse dihet botërisht se incidenti ndodhi tek Tregu Ushqimor i Elbasanit, pronë e Petrit Celës (babai i Suelit). Po kështu makina Audi A8 e blinduar që goditi policinë ishte në pronësi të tyre.
/Opinion.al
