Duke kërkuar ndjesë për gabimet që Partia Demokratike ka bërë gjatë qeverisjes së saj, Kryetari, Lulzim Basha u tha të rinjve të Akademisë Politike se opozita do t’i qëndrojë modelit të referendumit qytetar, për çështje që kanë të bëjnë me interesin publik, duke i’u referuar çështjes më të debatuar të momentit, asaj të importit të mbetejeve.
Tre vitet e qeverisjes të koalicionit të majtë, Basha i vlerësoi si rrënim për vendin dhe pengesë për integrimin në Bashkimin Europian.
Zgjedhjet e ardhsme parlamentare Basha i quajti betejën më të ashpër të opozitës karshi kartelit të drogës dhe mafies qeveritare. Ndaj dhe u shpreh i hapur për prurje të reja dhe qarkullim të elitave në Partinë Demokratike.
“Integrimi europian i vendit është në rrezik. Nuk mund të hapë negociata një vend ku qeveria e të cilit dhunon zgjedhjet dhe bëhet njësh me trafikantët e drogës. Nuk mund të hapë negociata një vend që dhunon maturantët e tij. Nuk mund të hapë negociata një vend ku vidhet ditën me diell.
Jemi këtu sepse ka shpresë, ka besim, ka zgjidhje, dhe kjo është Partia Demokratike .
Ne do të japim përgjigje të qarta dhe të prera për qytetarët. Kemi patur edhe ne gabimet tona, por kemi patur një vizion dhe një plan. Kemi gabuar, kemi reflektuar dhe do të shkojmë përpara. Çdo ndjesë për gabimet duhet të jetë e sinqertë. Nuk e kërkojmë dhe nuk do ta kërkojmë votën për të sjellë PD në pushtet, por për të sjellë qytetarin në pushtet.
Është dhe duhet të jetë mbi të gjitha betejë e rinisë shqiptare, betejë e rinisë demokrate.
Rinia është gjeneza e PD-së. Është rruga e drejtë, rruga e duhur për të ndezur shpresën. Beteja është e vështirë, interesat kriminale e korruptive janë të mëdha.
1 miliard euro në vit zhbëhen nga buxheti i shtetit dhe përfundojnë në xhepat e korrupsionit.
Ne vijmë këtu me një shpresë dhe besim të madh. Qytetari shqiptar sot është i rrënuar dhe i braktisur. Kemi reflektuar për gabimet që sollën rotacionin. Në politikë nuk duhet të thyhesh nga pengesat.”/tvklan.al
