“Turp të kemi!” Me këto fjalë iu drejtua aktivistja nga Kosova ambasadores së Kosovës në SHBA, Vlora Çitaku. Ngjarja ndodhi në Universitetin e Denverit ku Citaku ishte e ftuar bashkë me ish-ambasadorin Christopher Hill, i cili në fund të viteve 90-të ka ndërmjetësuar në konfliktin Kosovë – Serbi.
Pas debatit, aktivistja Vlerta Vdili ka qëlluar me vezë ambasdoren.
Ajo i bërë pyetje rreth vdekjes së Astrit Deharit duke hedhur akuza për vrasje. Gjithashtu aktivistja iu drejtua me fjalët se po gënjen për situatën në Kosovë pasi atje s’ka vende punës, ka situatë të keqe në shëndetësi e arsim, të drejtat e cënuara të komunitetit LGBT, etj.
Lajmi për sulmin është shpërndarë në rrjetet sociale nga aktivistë të Vetëvendosjes. Ndërkohë për sulmin ka rrëfyer edhe vetë ambasadorja në një postim në Facebook.
Postimi i Çitakut
Sot kam qenë e ftuar në një bashkëbisedim nga Denver Women in International Security. Bashkë me Ambasadorin Christoper Hill sqaruam para studentëve dhe mysafirëve të shumtë situatën në Kosovë dhe Ballkan, rritjen e influencës Ruse dhe nevojën për rritjen e vëmendjes së SHBA-ve karrshi Kosovës dhe rajonit tonë.
Bashkëbisedimi ishte shumë dinamik, dhe pati shumë pyetje interesante për rrolin e NATO-s, të drejtën ndërkombëtare, rolin e gruas në proceset e shtetndërtimit etj. Nga fundi I bashkëbisedimit, një aktiviste shqiptare, u ngrit, më akuzoi se jam kriminele, vrasëse ( duke iu referuar vdekjes së Astrit Deharit ), pastaj akuzoi Ambasadorin Hill që po promovon kriminelët.
Dhe në fund hodhi vezë në drejtimin tim. Vezët nuk e kanë vrarë kurrë askënd.
Po fjalët vrasin. Sigurisht që ndjehem e lënduar nga ato fjalë të rënda, dhe nga ato shpifje pa kripë. Është krejt normale të kemi mospajtime, por ato duhet të mbesin në nivelin e debatit, e asnjëhere në sulm e shpifje ndaj tjetrit.
