Koordinatori i Bindes Demokratike, Astrit Patozi, është shprehur se momenti kur Ilir Meta është zgjedhur president, ishte dhe fundi i Republikës.
Patozi ka komentuar në “Abcnews” dhe vendimin e presidentit për anulimin e 30 qershorit, e cila më herët ishte dekretuar për zhvillimin e zgjedhjeve lokale.
Ai tha se anulimi i datës së zgjedhjeve është anti-kushtetuese, ndërsa theksoi se për BD nuk ka rëndësi se kur do të zhvillohen zgjedhjet lokale.
“Kjo është situatë surreale e cila nuk është e papritur për mua të paktën. Unë kur u zgjodh Ilir Meta President kam bërë një status asokohe që është fundi i Republikës sepse Ilir Metën gati po e çonin me barelë në institucionin më të lartë të shtetit dhe socialistët ishin shumë të mërzitur, ndërsa Ilir Meta ishte më i mërzitur vetë se ata që e kishin zgjedhur. Kjo lojë me Republikën është fundi i sistemit. E kam shkruar atëherë që është fundi i sistemit sepse socialistët e trajtuan atë sikur po e internonin. Socialistëve iu është bërë shumë mirë që iu është kthyer në kokë ajo shaka që bënë atëherë dhe pavarësisht se Edi Rama thotë sot “se nuk kam asnjë lloj pendese që zgjodha Ilir Metën President se nuk mund ta dija ça do bënte ai”, unë jam shumë i sigurt se ai e ka ditur shumë mirë se kë po çonte në Presidencë. Por e ka çuar si hileqar, e ka çuar si pazarxhi, e ka çuar për ta hequr qafe dhe ndërkohë e ka mbas qafe sot. Besoj që do mbahen, por tek e fundit ne e kemi theksuar që në fillim që nuk ka rëndësi data. Ne kemi marrë vendimin e parë politik që do të hyjmë në këto zgjedhje kurdo që të mbahen dhe sigurisht ne kemi pasur 30 Qershorin si stacion sepse ka pasur një dekret për këtë Presidenti i Republikës, i cili pastaj ka ndryshuar mendje. Sipas nesh ishte anti-kushtetues, por tek e fundit qeveria ka një opinion tjetër, presidenti opinion tjetër, PD opinion tjetër. Tek e fundit nuk e ndajnë palët se kur duhet të jenë zgjedhjet, duhet të jenë institucionet shqiptare. Këto që janë me gjithë rezervat që mund të kemi me gjithë deficencat që ata kanë, por kështu ka ndodhur gjithmonë në Shqipëri. Nuk mund ta ndajnë dot palët se kush është kushtetuese, kush nuk është kushtetuese apo kush është e drejtë, kush është e padrejtë”, tha Patozi./ Opinion.al E.Xh.
