Gjykata e Posaçme Anti-Korrupsion ka reaguar pas publikimit nga kryebashkiaku Erion Veliaj i transkriptimit të replikave gjatë seancës gjyqësore të 12 shkurtit ku iu caktua masa e sigurisë “arrest me burg”.
GJKKO thekson se transkripti i publikuar nga ana e Erion Veliaj në rrjetin e tij social në “Facebook” nuk është i vërtetë.
Gjykata e Posaçme shprehet se është bërë verifikimi në sistemin audio të seancës gjyqësore për marrjen në pyetje të kryebashkiakut të Tiranës, si edhe procesverbali i seancës gjyqësore.
Por, thekson se nga ana e prokurorit të çështjes nuk rezulton që të jetë përdorur fjala “ndyrësirë” në asnjë moment.
“Nisur nga interesimi i lartë dhe i vazhdueshëm nga ana juaj, duke paraqitur dhe kërkesa për informacion, në bazë të ligjit Nr. 119/2014 “Për të drejtën e informimit”, i ndryshuar, në lidhje me vërtetësinë e pjesës së procesverbalit të seancës gjyqësore, të datës 12.02.2025, të publikuar ditën e sotme nga personi nën hetim Erion Veliaj, në rrjetin e tij social në “Facebook”, ju bëjmë me dije se nuk është i vërtetë.
Nga verifikimi i bërë në sistemin audio, të seancës gjyqësore për marrjen në pyetje të personave nën hetim Erion Veliaj, etj., të datës 12.02.2025, konkretisht intervali kohor 6:34:02 PM – 6:34:57 PM (të cilit i referohet i hetuari Erion Veliaj në postimin e tij) si dhe nga procesverbali i seancës gjyqësore, nuk rezulton që të jetë përdorur fjala “ndyrësirë” nga ana e prokurorit Ols Dado në asnjë moment”, shkruhet në reagimin e GJKKO-së.
