Seanca gjyqësore e kësaj të enjte paradite ku ish ministri i Brendshëm Saimir Tahiri dha argumentet mbrojtëse kundër kërkesës së prokurorisë për dënimin e tij me 12 vite burg, pati një interes shumë të madh mediatik dhe jo vetëm.
Në seancë gjatë gjithë kohës ishin të pranishëm dy përfaqësues të ambasadës amerikane. Nuk është hera e parë që zyrtare të ambasadës ndjekin procese gjyqësore në vendin tonë, pasi me parë ka ndodhur edhe me Emiliano Shullazin dhe Dritan Dajtin.
Por veç përfaqësuesve të ambasadës, nuk ka munguar edhe prania në sallë edhe e gazetareve të huaj.
Nga ana tjetër duket se Tahiri e “kishte përgatitur terrenin”. Jashtë Gjykatës së Krimeve të Rënda kishte prani të mbështetësve të ish ministrit të Brendshëm, gjë e zakonshme kjo që nga koha kur Tahiri u njoh me akuzat. Pasi doli nga Gjykata, Tahiri është përballur me përqafime dhe puthje të mbështetësve të vet./ Opinion.al
