Babai i foshnjës 15 muajshe nga Fllaka e Durrësit, që shkoi në urgjencën e Durrësit pa shenja jete, tregon të gjithë problemet që ka pasur vajza e tyre prej tre ditësh. Sipas Kujtim Agës e vogla kishte vështirësi në frymëmarrje, prandaj edhe më 14 prill ai bashkë me të shoqen e çuan për vizitë në Pediatrinë e Durrësit.
“Ne e sollëm para tre netësh vajzën në Pediatrinë e Durrësit, kishte vështirësi në frymëmarrje. Mjekja i bëri një vizitë dhe na dha një mjekim për në shtëpi. Disa ilaçe ia bleva që atë natë, disa të tjera në mëngjes. Vajza gjatë këtyre ditëve ka pasur vetëm vështirësi në frymëmarrje. Ia kemi bërë mjekimin siç na tha mjekja”, – u shpreh i ati, raporton BW.
E ndërsa kujton momentet e vështira të natës së mbrëmshme, ai thotë se ka qenë bashkëshortja ajo që është zgjuar “rreth orës 01:00 pas mesnate dhe e ka gjetur vajzën. Pastaj erdhi urgjenca dhe e mori, vajzën e gjetën të pajetë”,- shtoi ai.
Për gjithë këtë histori tronditëse, ai bën përgjegjëse, mjeken. “Duhej ta kishte shtruar vajzën në spital, ne ja thamë shqetësimet”, shtoi Aga.
Në lidhje me ngjarjen ka folur edhe shefi i pediatrisë së Durrësit, Fatmir Shanini i cili ka deklaruar se vajza është paraqitur në 14 prill në orën 23:00 të mbrëmjes, me probleme në rrugët e frymarrjes.
Ai tregon se i është dhënë ndihma e nevojshme atë natë, por mohon që viroza e stinës të jetë shkak për vdekjen. Shahini thekson se shkakun do ta nxjerrë vetëm ekspertiza.
“I kemi bërë një aerosol që u zhbllokua nga sekrecione aparati i frymëmarrjes. Iu dha një mjekim nga doktoresha që ishte roje, shkak për vdekjen nuk është viroza e stinës. Shkaqet mund të jenë të ndryshme, por do përcaktohen nga ekspertiza. Mund të të jetë një vdekje e menjëhershme, por edhe për shkak të mbytjes nga kalimi i sekrecioneve në rrugët e frymëmarrjes”,- sqaroi ai.
Kujtojmë që për të kryer ekspertizën në spitalin e Durrësit ka shkuar edhe një mjek nga Tirana, ndërsa policia ka marrë të gjithë kartelën e foshnjës, për të hetuar në lidhje me këtë rast. /BW
