Udhëheqësi iranian Ayatollah Ali Khamenei deklaroi se Shtetet e Bashkuara kishin bërë “një veprim të egër” në caktimin e ushtrisë së tyre si një organizatë terroriste e huaj. Ai shtoi se Teherani zotohet të ndërmarrë veprime kundër forcave amerikane në rajon.
“Zotohemi të ndërmarrim veprime kundër forcave amerikane në rajon. Ata dëshirojnë të komplotojnë kundër Sepës tonë (Garda), por ajo është në vijën e parë të përballjes me armiqtë e revolucionit tonë (1979) dhe ka mbrojtur gjithmonë vendin. Amerika nuk ka arritur të bllokojë përparimet tona. Pavarësisht nga të gjitha presionet gjatë 40 viteve të fundit, amerikanët kanë dështuar të bëjnë gjë për të na çoroditur dhe veprimi i tyre i keq nuk do të japë fryt”, shtoi ai.
Presidenti iranian, Hassan Rouhani gjithashtu mbrojti trupat si mbrojtës të Iranit, duke thënë në një fjalim televiziv se Shtetet e Bashkuara “kanë një ndjenjë” kundër rojeve që kanë “sakrifikuar jetën e tyre për të mbrojtur popullin tonë, revolucionin tonë”.
Kujtojmë se SHBA cilësoi Gardën Revolucionare elitare të Iranit, si një organizatë terroriste e huaj, duke shënuar kështu herën e parë në histori që Uashingtoni ka etiketuar zyrtarisht një ushtri si grup terrorist, vendim ky që ka gjasa të rrisë tensionet në Lindjen e Mesme.
Administrata Trump është fokusuar prej kohësh tek IRGC dhe marrja në shënjestër e këtij entiteti të rrezikshëm, por ky vendim diskutohet prej vitesh në SHBA.
Në vitin 2007, ishte Thesari i Shteteve të Bashkuara ai që caktoi forcën Quds të IRGC-së, njësinë e saj përgjegjëse për operacionet jashtë vendit, “për mbështetjen e saj ndaj terrorizmit” dhe e përshkroi atë si “krahun kryesor të Iranit për zbatimin e politikës së saj për mbështetjen e grupeve terroriste dhe kryengritëse”.
Sipas mediave amerikane që nga themelimi i saj në vitin 1979, IRGC ka luajtur një rol aktiv në masat shtypëse kundër gjithë protestave e kryengritjeve që kanë ndodhur gjatë 40 viteve të shkuara, si dhe në zgjerimin e ndikimit malinj të mullahëve në Lindjen e Mesme përmes grupeve terroriste proksi./Opinion.al
