Një ushtar amerikan që shërbente me trupat paqeruajtëse në Kosovë ka humbur jetën më 4 Korrik. Departamenti amerikan i Mbrojtjes njoftoi mbrëmjen e së hënës se 20 vjeçari Alexander Blake Klass, nga Willamina e Oregonit, ka humbur jetën në një incident që nuk kishte të bënte me veprim të armatosura në kampin e Novo Sellës, në Kosovë.
Departamenti i Mbrojtjes tha se incidenti është duke u hetuar, por nuk dha më shumë hollësi rreth vdekjes së pjesëtarit të Gardës Kombëtare të Oregonit. Njësitë ku shërbente ai u vendosën në Kosovë në fillim të muajit mars të këtij viti.
Klass i ishte bashkuar Gardës Kombëtare të Oregonit në Janar të vitit 2019 në repartin e këmbësorisë. Ai u mobilizua në Janar 2020 dhe parashikohej të kthehej në shtëpi nga Kosova në Nëntor të këtij viti./Opinion.al
